“Хүүхэд” гэдэг үгийн цаана “хүсээгүй дайн” өрнөдөг болжээ. Гэр бүлийн хүчирхийлэл, архидалт зэрэг нь хүүхдийн эрхийг бүдүүлгээр зөрчиж, хүн байх эрхийг нь хасаад байх шиг. Хүүхэд л бол хүүхэд шүү дээ. Аав, ээжийнхээ хайранд өлгийдүүлж, алтан дэлхийд амгалан тайван амьдрах эрх тэдэнд бий. Гэтэл гэм, зэмгүй тэднийг гэр бүлийн дарамтад оруулдаг эцэг, эхчүүд дэндүү олон болж. Манай сонин өмнөх дугаарууддаа хүүхдийн эрхийг хамгаалах үйлст хүчтэй дуу хоолой болох үүднээс цуврал нийтлэл хүргэсэн. Өнгөрсөн хугацаанд “Ямар ээж гэхээр хүүхдээ орхиод явдгийг ойлгохгүй байна”, “Э.Алтангэрэл  хүүг ад үзсэн ээжийг нь эрэн сурвалжилъя” гэсэн нийтлэлийг уншигчиддаа

хүргэсэн. Тэгвэл эрх нь зөрчигдөж, ээждээ хаягдсан Э.Алтангэрэл хүүгийн талаар нэхэн сурвалжиллаа. Хүү улсын гэх тодотголтой “Энэрэл” эмнэлэгт хэвтэж буй. Өмнө нь “Мөнгөн гүүр” эмнэлэгт хэвтэж байгаад ийнхүү бууриа сэлгэсэн нь энэ. Нэг үеэ бодвол хүүгийн бие дээрджээ. Түүний биеийн 50-60 хувь нь түлэгдсэн болохоор урт хугацааны эмчилгээ шаардлагатайг эмчлэгч эмч А.Тайван онцолсон. Хоёр сарын турш эмнэлэгт хэвтсэн болоод ч тэр үү эмч, сувилагчдын “ааш”-ийг олжээ. Өөрөө хөдөлж чадахгүй болохоор наашаа харсан нэгнийг царайчилж, харцаараа гуйна. Түүнийг нь мэдэрсэн өрөөнийхөн нь хүүд туслахдаа ч дуртай.

Э.Алтангэрэл хэлье гэснээ шууд хэлчихэж чадахгүй болохоор үйл хөдлөлөөрөө л өөрийгөө илэрхийлдэг аж. Хүүгийн ирээдүйд санаа зовиносон олон хүн бий. Тэдний нэгээхэн хэсэг нь “Оюунлаг нийгмийн залуус” төрийн бус байгууллагынхан юм. Тус байгууллагын тэргүүн өчигдөр хүүд хэдэн ээлжийн солих хувцас, ойр зуурын хэрэглээний зүйлс гардуулж өгөв. Хүү цаанаа л нэг баяртай байв. Нүүрэнд нь баярласан өнгө аяс илрэх ч нүдэнд нь гуниг хургажээ.

Яагаад гэвэл тэр бусад хүүхэдтэй адил баярласнаа илэрхийлж гүйж, харайж чадахгүй. Хоёр хөл нь татаж, нэг гараа тайруулсан болохоор тэр. Гэхдээ түүнд асар их сэтгэлийн дэм байгаа нь илт байв. Өвчиндөө шаналж, хөнжилдөө нулимсаа нуун өр зүрхэндээ ээжийгээ үгүйлсэн хүүд нэг л зүйл дутуу нь мэдрэгдсэн юм. Тэрбээр хаалга онгойх бүрт “Ээж минь биш байгаа” гэсэн горьдлогын нүдээр ширтэнэ. Өөрөөр хэлбэл, хүүгийн нүд ээжийнхээ эрэлд хатжээ.

СУВИЛАГЧААНАДТАЙ ХӨЗӨР ТОГЛООЧ

Биднийг Э.Алтангэрэл хүүг зорьж очиход, эмч нь “Манай хүн сайжирч байгаа. Хажуугаараа гарсан сувилагчийг “Надтай хөзөр тоглооч” гээд хормойддог болсон” гэсээр угтсан. Хүү уйдахаараа хэн нэгнийг хамт тоглохыг уриалдаг бололтой. Тэрбээр түлэгдэхээсээ өмнө төрсөн дүү Э.Эрдэнэбаяртайгаа тоглодог байсан биз. Эмнэлгийн төмөр орон дээр хөдөлж чадахгүй түүнд туслах аян өрнөсөөр. Сэтгэлийн дэм хайрлах гэсэн сайхан сэтгэлтнүүд хаа байсан Солонгос, Герман, Хятад улсаас хүүд хэрэглэгдэх зүйлсийг илгээсээр байгаа аж. Эхний ээлжинд Солонгос улсаас цамц, өмд, зургийн дэвтэр,

харандаа, оймс, оо, сойз иржээ. Энэ бүгд эзэндээ хүрснийг дуулгахад таатай байна. Хүү өмнөхөө бодвол цай, хоолоо сайн иддэг болсон гэнэ. Хааяа дуртай зүйлсээ хэтрүүлж идээд гэдэс нь эвгүйрхэдгийг эс тооцвол дажгүй ээ. Сүү, тараг, каашнаас буцдаггүй аж. Харин хүүгийн хийлгэх дургүй зүйл нь шархаа цэвэрлүүлэх юм. Боолт хийлгэх үед өрөөнд нь багахан хэмжээний “дайн” болдог байна. Уйлж, хашгирах энүүхэнд, хааяа өвчнөө тэсч чадахгүй эмчийн гарыг маажих, хазах зэргээр эсэргүүцлээ илэрхийлдэг байна. Бусдаар бол

Э.Алтангэрэл эмнэлэгтээ “од” болжээ. Түүнийг эргэж тойрох хүмүүсийн цуваа ч тасрахгүй үргэлжилдэг байна. Хүүгийн биеийн байдал ямар байгаа талаар мэс заслын эмч А.Тайванаас асуухад, “Эмнэлэгтээ дасаад дажгүй болсон. Манай сувилагчийг хөзөр тоглоё гээд байгаа. Биеийнх нь эсэргүүцлийг сайжруулах витамин өгч, тамир тэнхээ оруулах, боолт эмчилгээ хийж байгаа. Хүүхдийн биеийн байдал ирснээ бодвол хэвийн. Арьс нь хөрсжиж байна. Боолт хийх үед зовиур ихтэй. Өдөр өдөрт нь дасгаж татлага хийж байгаа” гэв. “Энэрэл” эмнэлгийн тухайд эмзэг бүлгийнхэн гэгдэх орон гэргүйчүүдэд тусламж үзүүлдэг байна. Эмнэлгийн орчин нөхцөл зориулалтын бус нөхцөлд байдгийг эс тооцвол эмчилгээ, сувилгаа сайн аж. “Манайх орныхоо тоогоор 46 өвчтөн хүлээж авдаг. Сэхээний тасагтай. Тэнд 4-5 хүн бий. Эмч нарын хүрэлцээ сайн ч сэхээн амьдруулахын эмч дутагдалтай. Байгуулагдаад 12 жил болж байгаа ч эмнэлгийн бус байранд үйл ажиллагаа явуулж байна. Эм тарианы хувьд хүртээмжтэй боломжийн. Архичин, гэр оронгүй, бичиг баримтгүй, бусад эмнэлэгт авдаггүй хүмүүс л манайд ирж хэвтдэг. Манай яамныхан орон байрыг минь шинэчилж өгнө гэдэгт итгээд л сууж байна” хэмээн эмч ярьсан юм.

Э.АЛТАНГЭРЭЛ ХҮҮД ЭХНИЙ ЭЭЛЖИНД ЗУЗААН ХӨНЖИЛ ХЭРЭГТЭЙ ГЭВ

“Э.Алтангэрэл хүүг хөл дээр нь босгох юмсан. Хүн шиг хүн болгоосой” гэсэн гэгээн хүсэлтэй хүмүүс олон байгаа ч гөлөг төөрүүлж байгаа юм шиг үрээ хаясан эхийг нь бодохоор урам хугармаар санагдсан. Эхийн санаа үрд гэдэг дээ. Гэтэл үрээ үнсэнд хаясан шалз шиг орхиод явсан ээжийг үзэн ядах сэтгэл төрснийг нуух юун. Өдгөө хүү 15 настай ч сайн ярьж чаддаггүй аж. Хүний хэлснийг ойлгодог хэрнээ зөрүүлээд хариулж чадахгүй юм билээ. Үүндээ ичээд ч тэр үү жуумалзан инээх нь хүүхдийн цайлган зан гэлтэй. Хүү хэдийгээр хэлж, ярьж чадахгүй ч цаанаа л нэг сэргэлэн зантай юм шиг санагдсан. Өөрт нь тусалсан хэнд ч болов цайлган инээдээрээ бэлэг барьдаг аж. Хүүгийн өрөөнд түр саатах зуур нэг эмч “Хүүд зузаан хөнжил хэрэгтэй байна. Нимгэн хөнжилтэй болохоор шөнөдөө даараад шарх нь сэдрэх гээд байна” гэснийг нуусангүй. Мэдээж физик эмчилгээний үр дүнг үзэхийн тулд хэвтрийн дэглэм сахих, хоол унд, гам алдахгүй дулаан байх зэрэг ихээхэн сувилгаа шаарддаг. Тэгэхээр хүүд нөмрөөд унтахад нь эвтэйхэн зузаан хөнжил хэрэгтэй гэсэн үг.

А.Лхагва  Үргэлжлэл бий…. /Нийгмийн толь/
Энэ мэдээ танд таалагдаж байвал LIKE дараарай. Танд баярлалаа.