Монголын ард түмний язгуур эрх ашгийн төлөө, шударга ёсны түүчээ болж яваад харгис эрх баригчдын бурангуй хуульд хилсээр шийтгэгдэн өргөст торны цаана тарчилж суугаа таныхаа энэ өдрийн амгаланг эрье.

Таны үйл хэрэг, сүүн цагаан сэтгэл, хэзээ ч үл нугарах хатан зоригийг тань ямар ч өргөст тор, хана хэрэм мохоож чадахгүй гэдэгт итгэдэг. Аль ч тохиолдолд хаана ч, долдой нар, бөгс долоогчид үүрлэсэн байдаг. Энэ ч утгаараа манай намын доторхи цөөн хэдэн бөгс долоогчид таны ариун нэрийг барьж ажил үүргээ гүйцэлдүүлэхээс бус жинхэнэ чин сэтгэлээсээ таны болон намын төлөө зүтгэдэг шударга хэсгийгээ ямагт хавчин гадуурхдаг төдийгүй, тантай нүүр тулан уулзах боломжийг байнга хааж байдаг юм.

Таныг хэвлэл уншиж байгааг бидний хэсэг журмын нөхөд мэдсэний улмаас арга буюу ил захидал бичин өөрсдийн өчүүхэн зүтгэлээрээ таныхаа чийгт гянданд тарчилж буй зүрх сэтгэлийг бүлээцүүлэхийг хүссэн билээ.

Шийлэгдамба дарга танаас өгсөн таван зүйл бүхий тэмцлийн хэлбэрийг бидэнд дуулгасан. Монголд болж байгаа Ардчилсан орнуудын хамтын нийгэмлэгийн чуулганыг үймүүлж, монголд харгис дэглэм тогтсон гэдгийг харуулах ажилд бидний нөхөд чин үнэндээ бөгс долоогчдоос илүү зүтгэж байгаагаа бахархалтайгаар уламжилъя.

Нэгдүгээрт нь таныг хэлмэгдэж, шоронд тарчилж байгаа гэдгийг гадны улс орнуудад ойлгуулах.

Хоёрдугаарт, Монголын шүүх, шоронг дэлхийд баймгүй харгис, шударга бус гэдгийг гадныханд ойлгуулах. Үүндээ Бааварын шатсан хэргийг ашиглах.

Гуравдугаарт, 2009 оны ерөнхийлөгчийн сонгууль шударга бус болсон гэдгийг илчилж, Ц.Элбэгдоржийг хууль бус ерөнхийлөгч хэмээн гадныханд ойлгуулах.

Дөрөвдүгээрт, Шүүхээс авлигын хэргүүдэд ялгавартайгаар шударга бус хандаж байгааг зарлах.

Тавдугаарт, Хэвлэл мэдээллийн эрх чөлөөг боомилж байгааг ойлгуулах зэрэг асуудлуудаар Ц.Шаравдорж даргын бичсэн захидлыг орчуулуулж дуусгалаа.

Бид уг захидлуудаа 1000 гаруй хувь хэвлэн дугтуйд хийж бэлэн болгосон. Мэдээж хэрэг зочид буудлуудаар яван гадны зочдод захидлаа гардуулах болно. Үүн дээр бага сага хэлний бэрхшээл л гарах юм.

Дарга минь санаа зовоод яахав. Дохиж зангаж байгаад ч болов захидлаа өг хэмээн Шараваа дарга хэлнэ билээ. Энэ ажил дээр Батбаяр, Нанжид, Шийлэгдамба дарга нар маань ихээхэн санаачилгатай ажиллаж байгааг бахархалтайгаар дуулгая.

Бид Баянсэлэнгэ гишүүнтэй уулзан таны хэлснээр гадны нөлөө бүхий албан тушаалтнуудыг эмнэлэг дээр аваачих тухай ярьсанд бас л хэлний бэрхшээл яриад байна лээ. Гэвч бүтэх байх аа дарга минь.

Бид энэ чуулгантай зэрэгцээд Ард түмний их хуралдайгаа 26-нд хийхээр болсныг та мэдэж байгаа. 27, 28-нд хөдөөгийн төлөөлөгчдийг барьж байх үүргийг намын зарим нөхөд цалгардуулах янзтай байна.   Мөн  МҮАН-аас орж ирсэн Цолмон дарга “Олон улсын хурал шүү дээ, бид жаахан соёлтой байвал яасан юм бэ” гэж хүнийрхүү сэтгэл гаргаж байгааг ч Та дотроо бодоход илүүдэхгүй биз. Гэвч Баярхүү, Энхбат хоёр маань энэ асуудлыг даахаар болсон. Зарим хүмүүс таны өгсөн мөнгийг хувьдаа завшаад байгааг та мэдсэн нь сайн болжээ.

Ингэхээр уг захидлыг хэн бичиж байгааг та гадарлаж байгаа байх. Хаа очиж нэг угшилтай юм гэсэндээ МАН-ынхан бидэнтэй хамтарч тэмцэхээр шийдсэн. Эдэнд эрх баригчдыг муухай харагдуулж л байвал хэнтэй ч нөхцөхөд бэлэн болжээ. Гэхдээ л та минь эдний үгэнд итгэж болохгүй шүү. Баянсэлэнгэ, Баасанхүү гишүүн хоёрт тийм их олон тооны урилга олдохгүй байгаа учраас шууд дайрч орох таны саналыг дэмжиж байгаа. Гэвч Н.Удвал сайд бас л үүн дээр цааргалах янзтай. Ардчилангуйлагчдад өгөх хамгийн том цохилт бол монголд харгис засаглал тогтсон гэдгийг нотлох явдал юм. Бид өнөөдрөөс эхлэн зочид ирэх бүхий л буудлууд дээр жижүүрлэж эхэлж байна.

Таны Ерөнхийлөгчийн сонгуульд нэр дэвших хүслийг чинь биелүүлэхийн төлөө бид бүхнийг умартан зүтгэх болно.

Шийлэгдамба дарга “Энхбаяр даргын эрх чөлөө монголын нэр хүндээс үнэтэй” гэж хэлсэн нь юутай үнэн бэ? Дарга минь та эрүүл байж гэмээнэ аяндаа төр улсаа төвхнүүлэн дахин ерөнхийлөгчийн сэнтийдээ заларна гэсэн үг. Тэр үед л бөгс долоогчдоос хол байна биз. Бид арга буюу ил захидал бичлээ. Сайн үйл дэлгэртүгэй.

МАХН-ын шударга нөхөд…