МҮОХ-ны Ерөнхийлөгч Д.Загдсүрэн Монгол Улсын Ерөнхийлөгчид хандан шударга унэнийг олж өгөөч гэсэн утга бүхий захидал бичсэнээ өдөр тутмын хэдэн сонинд дайлаа.

Захидалд өгүүлснээр бол Голомтын бас Оюутны спортын гэгддэг Д.Баясгалан болон түүний багийн анд Жаргалсайхан, даамын Бат-Эрдэнэ нар эртнээс түүнийг унагах төлөвлөгөөтэй байсныг илчилжээ. Мөн Ерөнхий прокурор Д.Дорлигжав ч МҮОХ-ны удирдлагад санаархаж буйг ч хэлсэн байна.

Түүнийг Тамирчны нөхөн сэргэх сувилал, Олимпийн хорооны газар, Олон улсын олимпийн хорооноос хэрэгждэг төсөл хөтөлбөрийн асуудлаар АТГ-аас шалгаж буй. Тэрээр их спорттой ажил амьдралаа холбосноос хойш гуч гаруй жил болж байгаа бөгөөд спортын эмнэлэг диспансерт лаборантаас эхлэн спортын эмчээр ажиллаж,

спортын анагаах ухааны чиглэлээр олон арван судалгаа шинжилгээ хийж, эрдмийн зэрэг хамгаалан, улмаар Монголын Үндэсний Олимпийн Хорооны /МҮОХ/-ны дэд ерөнхийлөгч, ерөнхийлөгчөөр сонгогдон ажиллаж байгаа аж.

Д.Загдсүрэн захидалдаа “МҮОХ-ны Ерөнхийлөгчийн сонгууль нь дөрвөн жилд нэг удаа болдог. 2012 оны арванхоёрдугаар сарын 19-нд ээлжит сонгууль нь болсон. Гэхдээ энэ удаагийн сонгууль шиг ийм хачин нөхцөл байдалтай, суудал сандлын арилжаа наймаа ярьсан сонгууль урьд өмнө нь болж байгаагүйг спорт, олимпийн зүтгэлтнүүд гайхаж байгаатай би санал нэг байгаа.

Уг нь би энэ удаад МҮОХ-ны ерөнхийлөгчид нэр дэвшихгүй гэсэн бодолтой байсан. Та санаж байгаа байх. ОУОХ-ны Ерөнхийлөгчийн шагналыг танд гардуулах үедээ, МҮОХ-ны ерөнхийлөгчийн энэ удаагийн сонгуулиар нэрээ татах бодолтой байгаа гэдгээ танд хэлж байсныг.

Би тийм бодолтой байсан. Харамсалтай нь сонгуулийн өмнөхөн болсон үйл явдлууд болон нэр дэвшигч Д.Баясгалан надтай уулзсанаас хойш энэ бодлоо эргэн харахад өөрийн эрхгүй хүргэсэн.

МҮОХ-ны ерөнхийлөгчийн сонгуульд нэр дэвшигч Д.Баясгалан надтай уулзаж, “Д.Дорлигжав нэрээ дэвшүүлнэ гэж байна. Тэр таны талаар ямар нэгэн баримт цуглуулсан байна. Нэрээ татахгүй бол хэрэгт холбогдуулж магадгүй юм шүү.

Хэрэв энэ тохиолдолд та нэрээ татаад, намайг дэмжвэл, би Дорлигжавтай ярьж түүнд мөнгө өгөх юм уу өөрийн бизнестээ оруулах замаар болиулах арга хэмжээ авья. Энэ бол таныг, бас МҮОХ-г бодсон хэрэг. Дорлигжав гарснаас би гарсан нь дээр.

Дорлигжав бас намайг таны хамсаатан юм байна шүү” гэсэн. Үүнээс гурав хоногийн дараа дахин Баясгалан надтай уулзаад, “Би Дорлигжавтай уулзлаа. Заавал нэр дэвшинэ гээд байна. Жүдогийн холбооноос Баттулга сайд нэр дэвшинэ гэж байсан юм байна.

Сайдыг Говь-Алтайд ажлаар явж байхад нь холбооных нь ерөнхий нарийн бичгийн дарга Бөхбатыг Дорлигжав дуудан, би нэр дэвших болсон гээд албан бичгийнх нь нэрийг солиулсныг Баттулга сайд мэдээгүй байгаа юм байна гэсэн утгатай зүйл ярьсан…” гэх мэтчилэн үйл явдлын дарааллыг нэг бүрчлэн бичсэн байв.

Тэрээр энэхүү захидлаараа Олимпийн хорооны эргэн тойрон болж буй хууль бус үйлдлүүдээс дэлгэжээ. Үнэхээр Загдсүрэн ноцтой зүйл дэлгэв үү, эсвэл гэдэг асуулт хариултаа нэхэн үлдэж байна. Тэгвэл түүний сонинуудаар илгээсэн захидлын хариуг Ерөнхий прокурор Д.Дорлигжав өгчээ.

Түүний хэлснээр бол “Д.Загдсүрэн олимпийн хорооны мэдлийн газар, олимпийн хорооны эрх мэдэл, олимпийн хорооны нэрийг ашиглаж хувийн бизнес хийсэн, улсын мөнгийг шамшигдуулсан болон бусад гэмт хэргийн шинжтэй үйлдлүүдээр шалгагдаж байгаа аж.

Тэгээд ч энд улстөржөөд байх зүйл байхгүй. Энэ албан тушаал улс төрд юу ч биш. Ер нь хэрэг хийсэн хүн болгон хэлмэгдлээ гэж Ерөнхийлөгчид сүржин захиа бичдэг болжээ.

Ерөнхийлөгч шүүгч юм шиг хууль хяналтын байгууллагын ажилд оролцуулж, ийм байдлаар хутган үймүүлж байж ял шийтгэлээс мултрана гэвэл энэ зорилго нь бүтэхгүй. Хэрвээ энэ хүний гэм буруу нь тогтоогдвол хэрэг нь шүүхэд шилжинэ.

Харин тэр үед би шүүх хурлыг орон даяар нээлттэй явуулах санал тавих болно. Энэ хүний үйл ажиллагаа улс төрийн шалтгаантай байсан уу, үгүй юу гэдгийг олон түмэнд ил тод харагдахаар нээлттэй явуулах саналыг би шүүхэд тавина.

Тэгэж байж олон түмэн хэн нь улстөржиж байгааг ойлгох байх” гэдгийг хатуу сануулсан байна. Ямартаа ч МҮОХ-ны Д.Загдсүрэнг тойрсон хэл ам олон хүнийг хэрэгт татаж магадгүй нь. Гагцхүү чухам үнэн хаана нуугдаж байсныг ойр дотны хүмүүс нь л мэдэх байх.