Тагнуулын ерөнхий газрын дэд дарга Б.Ариунсан ажлаа өгөх нь гэсэн мэдээлэл өнгөрөгч амралтын өдрүүдэд баттай эх сурвалжийн зүгээс нисч өнжив. Үүнтэй зуузай холбон Б.Ариунсанг Н.Алтанхуяг тийм ч амар ажлаас нь халчихгүй. АН- ыг санхүүжүүлэгчдийн тэргүүн эгнээний хүн. Ерөнхий сайдтай бизнесийн хамтрагч учраас тэр… гэсэн мэдээлэл бас цацагдлаа. Гэтэл Б.Ариунсанг ажлаас нь хурдхан шиг халахгүй бол Ерөнхий сайд өөрөө суудалдаа тэсч үлдэхэд бэрх боллоо гэх яриа дагалдсан нь сонирхол татаж байна. Учир юу вэ гэвэл иргэн Д.Ламжав түүнийг Үндсэн хууль зөрчсөн томилгоо хийсэн талаар Цэцэд хандаад байгаа билээ. Тэрбээр “Тагнуулын ерөнхий газрын дэд даргаар гүйцэтгэх ажлын мэдлэг туршлагатай байх хуулийн шаардлагыг хангаагүй хүнийг томилсон” хэмээн үзэж, Үндсэн хууль зөрчсөн эсэхийг тогтоолгохоор Цэцэд мэдээлэл хүргүүлсэн. Д.Ламжав Монгол Улсын Ерөнхий сайд Н.Алтанхуягийн дээрх захирамж нь Үндсэн хуульд заасан “хууль дээдлэх” зарчмыг алдагдуулж, улмаар үндэсний аюулгүй байдал, нийгмийн дэг журмыг хангах төрийн үүргийг хөсөрдүүлж байна хэмээн үзсэн байна. Эрх баригчдын буруу шийдвэр, алдаатай бодлогод байнга хяналт тавьж, зарга үүсгэж, заргаа авч ирсэн иргэн Д.Ламжавын өмнө Н.Алтанхуяг сайд сөхрөхөөс өөр аргагүй байдалд оржээ. Тиймээс энэхүү маргааныг хянан шийдвэрлэх Цэцийн дунд суудлын хуралдаан 2013 оны гуравдугаар сарын 20-ны өдөр болох юм. Ерөнхий сайд Н.Алтанхуяг өөрийгөө хамгаалж үлдэхийн тулд гуравдугаар сарын 20-ны өмнө Тагнуулын ерөнхий газрын дэд дарга Б.Ариунсанг ажлаас нь халахаас өөр ямар ч гарцгүй. Б.Ариунсанг гудамжинд залаад ч болов тэсч үлдэх үү, үгүй юу гэдэг асуудал ч сөхөгдөх болно. Яахав олонхийн хүч, шүүх эрх мэдлийн дарангуйлал АН-д байгаа учраас суудалдаа үлдэж болох юм. Иргэн Д.Ламжавын Цэцэд хандсан гомдлыг зөвхөн Б.Ариунсангаар “туг тахиад” цайруулчих нь юу л бол. Гэхдээ л Н.Алтанхуягийн өөрийгөө хамгаалж үлдэх цор ганц арга нь энэ юм хойно өөр яалтай ч билээ. Хамгийн гол нь Ерөнхий сайд маань одоогоос сар хүрэхгүй хугацааны өмнө хэсэг иргэдийн гомдлын дагуу Үндсэн хуулийн цэцэд шалгагдаад “унах” гэж байсан ч дунд суудлын хуралдаан болохын өмнөх өдөр Ч.Сайханбилэг түүнийг аварч байв. Аврах ч гэж дээ. Ерөнхий сайдынхаа өмнөөс бурууг нь хүлээж, нийгэмд асаад байсан галыг намдаах замаар аргалсан санаатай. Түүнээс биш Ерөнхий сайд нэгэнт хууль зөрчсөн болохоор хариуцлага хүлээх ёстой байв. Гэтэл ямар ч хариуцлага хүлээсэнгүй. Энэ тухай баримт дэлгэхэд, өнгөрөгч хоёрдугаар сард Н.Алтанхуягийг Хөвсгөл, Дорнод аймгийн Засаг даргаар “үүрэг гүйцэтгэгч” томилсон гэх үндэслэлээр хэсэг иргэд Үндсэн хуулийн цэцэд гомдол гаргасан билээ. Харин Цэц уг асуудлыг авч үзээд дунд суудлын хуралдаанаараа хоёрдугаар сарын 27- нд хэлэлцэхээр зар тараасан байв. Гэтэл өмнөх өдөр нь буюу хоёрдугаар сарын 26-нд Засгийн газрын Хэрэг эрхлэх газрын дарга Ч.Сайханбилэг дээрх хоёр аймгийн Засаг даргад “үүрэг гүйцэтгэгч” томилсон Ерөнхий сайд Н.Алтанхуягийн захирамжийг хүчингүй болгосон тухай бичиг Үндсэн хуулийн цэцэд өгүүлсэн билээ. Өөрөөр хэлбэл, Н.Алтанхуягийн гаргасан захирамж Үндсэн хууль зөрчсөн болохыг хүлээн зөвшөөрсөн хэрэг. Ийнхүү өөрийнхөө амийг хууль зөрчиж аварсан түүхтэй. Өнөөдрийн байдлаар ийнхүү хууль зөрчсөн үйлдлээ булзааруулж, Б.Ариунсанг ажлаас нь халснаар өөрийгөө аварч үлдэх гэсэн хэрэг. “Амташсан хэрээ арван гурав дахина” гэдэг шиг Н.Алтанхуяг сайд ийнхүү хууль зөрчөөд, зөрчсөн нь илрээд, унахдаа тулахаараа өмнөх тогтоолоо хүчингүй болгодог байдал чухам хэзээ дуусах юм бол. Энэ мэтээр Ерөнхий сайдын хууль зөрчсөн үйлдлүүдийг нь шүүхэд өгнө гэвэл лавтай 2013 онд багтахааргүй их ажил болно. Учир нь өнгөрөгч 2012 оны сонгуулиас хойш хагас жилийн нүүр үзэхэд хууль бус томилгоо хийсэн нь тоогоо алдсан. Ингэхэд Н.Алтанхуягийн халаасны хүн гэгдэх Б.Ариунсан гэж хэн бэ. Тэрбээр өмнөх Засгийн газрын үед Татварын ерөнхий газрын дарга, Эрдэс баялаг эрчим хүчний дэд сайд гэх зэрэг албан тушаалыг Н.Алтанхуягийн нөлөөнд хашиж ирсэн нэгэн гэдгийг надаар хэлүүлэх юун. Ардчилсан намыг Засгийн газрын хатавчинд амь зууж байх хугацаанд намыг санхүүжүүлэгч нарын нэг байсан төдийгүй бизнест өдгөөгийн Ерөнхий сайдтай ганзага нийлдэг нэгэн. Өөрөөр хэлбэл, Ерөнхий сайдтай хэтэвч нэг гэсэн үг. АН-д олон жил хөрөнгө оруулж ирсэн Б.Ариунсан нь Говь- Алтай аймгаас хоёр удаагийн сонгуульд нэр дэвшин өвдөг шороодсноос үзэхэд нутаг зондоо ямархан үнэлэгддэгийг харуулсан хэрэг болох байх. Эдийн засагч мэргэжилтэй Б.Ариунсан “шинэчлэлийн” хэмээх Засгийн газарт сайдын суудал горилж байсан ч нэгэнт багтаагүй учир дэд сайд, Төрийн нарийн бичгийн даргын суудалд өөрийгөө сууна гэдэгтээ итгэлтэй байсан ч удаа дараа томилгоонд орж байсан учраас мөн л хойш шидэгдэж, агентлагийн дарга болно гэдэг горьдлого тээсээр арай гэж Тагнуулын ерөнхий газрын дэд даргын суудалд очсон. Ёстой л “буруу харж уйлж, зөв харж инээж” байж энэ салбарт ямар ч мэдлэггүй нэгнийг хүчээр тавьсан. Үүнээс улбаалан бодоход тэрбээр АН-д, Н.Алтанхуягт багагүй үнэтэй хүн болох нь шууд харагдана. Б.Ариунсан хэдийгээр үнэтэй ч гэлээ Ерөнхий сайдын суудлын дэргэд юу ч биш учраас өнөөдөр ажлаа өгөх нь.