Хэдхэн жилийн өмнө “мода” монголоор дуусдаг гэж ярьдаг байлаа. Харин одоо бол эсрэгээрээ болжээ. Ямар ч брэндийн шинэ улирлын загваруудыг монголын “томчууд” цугласан газраас харж болохоор болсон цаг. Тиймдээ ч дэлхийд зөвшөөрөгдсөн томоохон брэндүүд монголын зах зээлийг сонирхож, судалж, зарим нь салбараа нээсэн. Төв талбайн хажууд сүндэрлэн буй “Централ таур”-т байрлах алдарт “Lous Voutton”-ы салбар дэлгүүр үүдээ нээхдээ, гурван жилийн дараа л ашиг олно хэмээн тооцоолж байсан гэдэг. Гэвч тэр тооцоо зөрж, ганц жилийн дотор зардлаа нөхөөд зогсохгүй, ашиг ч олоод эхэлсэн байна. Зөвхөн хувцас бус, гар утас, ганган төмөр хүлгүүдийг хүртэл дэлхийн баячуудтай эн зэрэгцэхээр эдэлдэг болж, монголчууд.

Дэлхийн нөлөө бүхий баячууд, супер одод, өв залгамжлагчид хэрэглэдэг тансаг зэрэглэлийн гар утас Монголын зах зээлд ч хэдийнэ орж ирсэн. Юун тухай ярьж байгааг та гадарлаж буй байх. Алдарт “Vertu” брэндийн нэрийн дэлгүүр монголд, тэр тусмаа өнөөх л “Цэнтрал таур”-ын нэг давхарт үүдээ нээгээд хагас жил болоогүй байна. Монголд зарагдаж байгаа “Vertu” утасны хамгийн хямдхан нь есөн сая бол, хамгийн үнэтэй нь 77 саяын өртөгтэй. Улсынхаа нийслэлд хоёр өрөө байр авчих хэмжээний үнэтэй уг утсыг барьсан улстөрчидтэй миний бие хэд хэд таарсан юмдаг. Мөн үйлдвэрээс гараад удаагүй байгаа алдарт хүлгүүд удалгүй л монголд орж ирдэг. Тэр байтугай үйлдвэрээс гарч амжаагүй машины захиалга монголоос орж ирлээ хэмээн дэлхий дахинд цацагдаж байсныг санаж буй биз.

Харин сүүлийн үед эрхэм  гишүүдийн гангараа брэндээс цойлж, гүйцэж түрүүлэхийн аргагүй болсон бололтой. Брэндээс давсан хэрэглээтэй, бэлтэй улстөрчдийн “мода”-ыг кёкүшюзан Д.Батбаяр дэлгэрүүлсэн. Тоохоо больсон уу, том биед нь таарчих брэнд олдоогүй юу, өмсөх хувцсаа гадаад улсад захиалгаар хийлгүүлж, зөвхөн кёкүшюзан Д.Батбаярт л зориулсан ганц хувь хувцас өмсөх хэв маягийг нэвтрүүлсэн юм. Харин энэ “мода”-ыг нь УИХ-ын дэд дарга М.Энхболд, Шадар сайд байх үедээ үргэлжлүүлэн өөрийнхөө нэрийг шаглуулсан, дахин давтагдашгүй хийц, материалтай дээлээр гангарсан юмдаг. Түүнийгээ бусдын нүднээс нуух нь бүү хэл харин ч нэг лекламдаж өгсөн шүү. Түүнээс хойш ийм гангараатай болох гэсэн хүсэлтэй гишүүн цөөнгүй байсан. УИХ-ын гишүүн асан Ш.Сайхансамбуу л гэхэд өөрийн хувцсан дээр “Ш.С” гэсэн шаглааг хийлгэж байсан. С.Баямбацогт, Д.Хаянхярваа …. гээд олон гишүүн энэ “шаглаа”-ны хажуугаар өнгөрөөгүй.

Дэлхийн нэртэй улстөрчид хүртэл брэндээр гангардаг байхад манайхан бүр цойлж нэрийн брэндтэй болсон байгаа нь бахархмаар ч юм шиг. Бусдаас ялгарах гэсэн бузгай хүсэлд нь саад болсон болохоор брэндийг голохгүй гээд яах ч билээ дээ. Жирийн иргэдийнх нь дийлэнх нь бээжин бараанд хууртаж суухад эрхэм гишүүдийн гангараа эгэл байтугай, энгүй хэмжээнд хүрснийг харахаад монголчуудын баян, хоосны ялгаа тэнгэр газар шиг холдсоны баталгаа ч юм шиг.