Монголын түүхэнд хэмжээгүй эрх мэдэлтэй даргын төлөө эхчүүд 10, 20-иороо хоолноос татгалзан өл­сөж, хар усаар голоо зогоон үхэл амьдралын зааг дээр очиж байсан нь үгүй. Бид чинь бас ч гэж дэлхийн талыг эрхшээлдээ оруулж, эмх цэгц, захирах, захираг­дах ёсыг  бусдад сур­ган товхинуулж явсан их эзэн Чингисийн үр сад.

Эзэн Богд Чингис хаан маань хэрэв дээд тэнгэрээс таалан соёрхдогсон бол эхчүүд, эмэгтэйчүүдийнхээ  оюун ухаан, амьдралаар нь тоглоом зугаа хийж, нэг дор бөөнөөр нь өлсгөөд хэв­түүл­чихсэн байгааг хараад ямар их хилэгнэх бол.

Н.Энхбаяр дарга аа, та одоо боль л доо. Улс эх орныхоо төлөө таны хийсэн ажил, хийхээр дотор сэтгэлдээ төлөвлөн бодож яваа бүхнийг тань ард түмэн тэртэй тэргүй дүгнэж, цэгнэж л байгаа. 2012 оны дөрөвдүгээр сарын 13-ны өглөө гэрээсээ баригдаад явахыг тань хар­сан хөгшүүдийн даралт одоо ч хөдөлсөн хэвээрээ л байгаа. Эмнэлгийн цонхоор харагдсан ядруухан царай, цугласан олон руу инээмсэглэн гараа хөдөлгөж зогссон тэр л дүр зургийг тань хүмүүс сэтгэлдээ нандигнан хадгалахыг хүсч байна.

Басхүү амьд бурхан залраад буугаад ирсэн юм шиг яаж ч  өөрийг тань  магтан дуулж, хөгшид, эхчүүдийн оюун ухааныг самууруулаад  Н.Энхбаяр та өө сэвгүй, өчүүхэн ч хир буртаггүй нэгэн болчихгүй. Мах, цусанд төрсөн нүгэлт хүн та нэгэн цагийн алдаа эндэгдэл, ухвар мөчид үйлдсэн бүхнийхээ  төлөө ял зэм хүлээсэн бол эр хүн шиг тэсч, тэвчээд эдлээд гараад ир л дээ.

Бүтэн зургаан сар ард иргэдээ хоёр, гурав хувааж, сэтгэл санаа, бие махбод, үзэл бодлоор нь уралцуулан хэлмэгдүүллээ шүү дээ. Таны урт гар, хорлонтой тушаал шийдвэр хүрэхгүй газар, нөлөөлөхгүй салбар гэж Монголд үлдсэнгүй. Хөлөө олох гэж дэнжигнэж яваа Н.Алтанхуягийн Засгийн газраар тоглочих шахсан. Хэдийгээр та  “Засгаас гарна гэж айлгаж байгаад Н.Алтанхуягийн чихийг зөөлрүүл” гэсэн тушаал өгсөн ч энэ нь нийгмийг тэр аяар нь цочроосныг та хараад баясч  суусан нь тодорхой.

Хөөрхий муу Ц.Оюунбаатарын УИХ-ын гишүүн болох мөрөөдөлд таны  хорлонтой хүчирхэг  гар л бүтэн зургаан сар хориг тавьж дөнгөсөн. Өөрийн тань өмнөөс гал, ус руу ч үсрээд орж мэдэх З.Баянсэлэнгэ, О.Баасанхүү нарын “нялх” гишүүдийг  УИХ-д чирээд оруулсан нь өнөөх л Н.Энхбаяр хэмээх нүдэнд үзэгдэж, гарт баригддаггүй ид шидийн хүч билээ.

Өнөөдөр таны бие барагтайхан байж ч мэднэ. Нэгэнт өөрийн тань эсрэг зогсолтгүй эргээд эхэлсэн төрийн төмөр механизмын эсрэг элдэв янзын аргаар сөрж тэмцэж, ядарч туйлдсан өөрийгөө ч, өрөөл бусдыг ч хөлдөө чирэхээ больчих л доо.

Өчигдөрхөн өөрийг тань суллуулахын төлөө 94 настай эмгэн буурал “өлсөж үхнэ” гээд хэвтэхээ мэдэгдсэн байна лээ. Энэ чинь одоо юу болж байна аа. Таныг эмнэлэгт өлссөнөөс хойш Монголд “өлсөж үхэх” хачин жигтэй моод дэлгэрээд байна. Арай ч дээ. 40 сая малтай монголчууд өлсөж, турж үхвэл ертөнцийн нүдний булай болно биз дээ. Танд төрийн гурван өндөрлөгт ажиллаж, Монголын төлөө чөмгөө дундартал зүтгэсэн гавьяа бий. Бас бидний мэдэх нь байтугай дуулаа ч үгүй гай балаг байгаа л байх. Гэхдээ одоо болно шүү дээ. Толгой нь эргэж, ухаан санаа нь самуурсан эхчүүд  10, 20-иороо өлсөж үхэх гээд байгааг  та л зогсоож чадна. Яагаад гэвэл таны урт гар, захиа даалгавар хүрэхгүй газар Монголд байхгүй шүү дээ. Үр хүүхэд, хань ижил, босгож бүтээсэн амьдралаа орхиж, таны төлөө турж үхэх гээд мугуйдлан зүтгэж байгаа монгол ээжүүдийг зогсоож хайрла. Н.Энхбаяр дарга аа, одоо больчих л доо.

Өглөөний сонин