Монгол Улсын Ерөнхийлөгч Ц.Элбэгдорж 2013 оны анхны нарыг дархан цаазат Богд уулын ноён оргил Цэцээ гүн дээрээс тоссон байна. Ерөнхийлөгчийн хамтаар Монголын твиттерчид шинэ оны анхны нарыг угтан эх орон, ард түмнийхээ заяа буяныг даатгасан аж.

Ерөнхийлөгч Цэцээ гүний орой дээрээс “2013 оны шинэ өглөөний мэнд. Монгол түмний хийморь заяа өөдрөг байг. Миний Монгол тахилгат их уулс шигээ мөнх оршиг” хэмээн твиттер хуудсаараа дамжуулан бичсэн байв.

Монгол Улсын Ерөнхийлөгч Ц.Элбэгдорж он солигдох мөчид ард иргэддээ хандаж хэлсэн үгэндээ “Гарч буй 2013 он Монгол түмний амьдралд өөдрөг сайхан өнгө нэмнэ. Газар бүр шинэ бүтээн байгуулалт өрнөж, хүн бүрийн ажил амьдрал өсөж дэвжихийг хүсэж байна. Он солигдох мөчид азай буурал ахмадууддаа “баярлалаа” гэж хэлье. Та бүхнийхээ бүтээснийг бид улам нэмж өсгөж өргөтгөх болно. Өдрөөс өдөрт олон болж байгаа алиа бяцхан үрсээ улам хайрлацгаая. Өрх гэрийн багана, түшиг болсон аав ээж, ах, эгч дүү, ураг саднаа улам хүндэлж явцгаая.

2013 онд манай ард түмний амжилт ялалт, бахархлын буухиа үргэлжлэх болтугай. Эх дэлхийд минь хайр энэрэл нэмэгдсэн их сайхан жил ирэх болтугай. Монгол түмний урагшлах зам өөдөө, цагаан байх болтугай” хэмээсэн билээ.

                                            М.Хангал