Нэгдүгээр төрөхийн зүүн хойд талд цөөхөн ч гэсэн модтой, явган хүний замтай юуны ч билээ хөшөө бас хэд гурван сандал бүхий бяцхан цэцэрлэг байсан нь саяхан.

Гэтэл нэг л өдөр тэр бичил цэцэрлэгийг тойруулан хашаа татаж орхисон. Хэн ингэснийг тухайн үеийн эрхтэн дархтнуудаас өөр хэн ч мэдээгүй гэхэд болно. Учир нь, тус газрын урд талын 58 дугаар байрны оршин суугчид хүүхэд, хөгшдөө салхилуулдаг газраа нэг л өглөө босохдоо хуулийг гууль болгогчид алдаж орхисноо мэдээд зохих газруудад нь хандсан ч тусыг эс олжээ.

Тэр ч байтугай нэр усаа ч хэлдэггүй баахан хүн хүрч ирээд газраа дур мэдэн томсгож, автомашиных нь зогсоолыг үгүй хийж, бараг орцных нь хаалга хүртэл хашаагаа тэлэн татаж орхисон. Ингээд сахиул гэж нэг айл буулгаж орхисон бөгөөд нөгөөдүүл нь жорлон барилгүй хэдэн жил дараалан мөнөөх хашаан дотроо дуртай газраа бие засаж, элдэв хог, үнс нурмаар хашаагаа дүүргэжээ.

Мөн тэр хавьд хөл хөдөлгөөн ихтэй тул янз бүрийн согтуу, хөлчүү хүмүүс хашааны эргэн тойронд бие засна. Ийнхүү нийслэлийн төвд албан ёсны бус ил задгай жорлон эсвэл хогийн цэг гэж нэрлэж болохоор нэгэн газар бий болсон байна.

Бичил цэцэрлэгийг аврах гээд өөрсдийн байрныхаа эзэмшил газраа алдах аюулд орсон СӨХ болон оршин суугчид нь энүүгээр, тэрүүгээр хөөцөлдөн гүйж, хэвлэл мэдээллийнхэнд хандсаныхаа хүчинд түр зуурын амжилтад хүрч, хашааг нь дотогш татуулсан. Гэхдээ олны хэл амнаас эмээхдээ түр зуур хашаагаа татсан гэдгээ хэлж, «Удахгүй танай байрны хойд талын газрыг нэмж авна.

Хашаагаа дахиад тэлэх болно» гэжээ. Энэ үед нийслэлийг хөгжүүлэх төлөвлөгөөний дагуу 58 дугаар байрны ар болон зүүн талаар шинэ зам тавьсан байна. Харин энэ шинэ сайхан зам тус байрныханд төдийгүй түүгээр явах хүмүүст зовлон нэмж, төвөг удах болжээ.

«Уг нь зам дагаж хөгжил гэдэгсэн. Гэтэл гай балаг л дуудсан» гэж оршин суугчид өгүүлж байсан юм. Данхайсан том хашааг машины зам дагуулан улмаар явган хүний гарцанд яг тулган барьснаас болж хойш, урагш хоёр урсгалаар явж байгаа машиныг явган хүн харах ямар ч боломжгүй аж. Зам хөндлөн гарах гэсэн хүн хаанаас машин ирж байгааг харах ямар ч аргагүй учир гарцан дээр дайруулах, мөргүүлэх болсон байна.

Уг нь, гарц гэдэг иргэдийг айх аюулгүйгээр замын хөдөлгөөнд оролцуулдаг, бүр цаашилбал, иргэний амьд явах эрхийг олгодог зүйл гэхэд болно. Гэтэл иргэд аз мэдэг гээд гүйхээрээ шахам гарахдаа шүргэх дөхөөд өнгөрөх машины салхийг нуруугаараа нэвт мэдрэх нь үхлийн ирмэг дээр очоод ирсэн мэт болж, хамаг бие нь агзас хийдэг тухай олон ч хүн ярьж байсан.

Газраа булаалгахын зэрэгцээ гарцаар гарахдаа дайруулж үхэх вий гэх айдас тээсэн 58 дугаар байрныхан нийтийн эзэмшлийн зам талбай болон инженерийн шугам сүлжээний хамгаалалтын бүс дээр газар эзэмшүүлж болохгүй. Авсан газраа хоёр жилийн хугацаанд зориулалтаар нь ашиглаагүй бол зөвшөөрлийг нь хүчингүй болгодог гэсэн хууль тогтоомжийн заалтыг баримтлан тус газрыг эзэмших эрхийг хүчингүй болгуулах хүсэлтийг Нийслэлийн Газрын Албанд гаргажээ.

Ийнхүү эрхтэн дархтны өмнө хүчгүйдэж байсан 58 дугаар байрныхан дөрвөн жилийн дараа тэдний газраас хууль бусаар’ хэн авч байсныг сая нэг юм олж мэдсэн байна. Учир нь, тэдний 4-5 жилийн тэмцлийн хариу болгон Нийслэлийн Газрын албанаас 58 дугаар байрны «СЭЛБЭ-58» сууц өмчлөгчдийн холбоонд 2011 оны зургаадугаар сарын 13-нд сая нэг юм албан тоот ирүүлжээ.

Тэрхүү бичигт «Нийслэлийн Засаг даргын 2007 оны нэгдүгээр сарын 11- ний өдрийн 06 тоот захирамжаар СБ дүүргийн нэгдүгээр хорооны нутаг дэвсгэрт 3200 m2 газрыг 15 жилийн хугацаатай «Ремиф» компанид эзэмшүүлсэн байна. Тус компанийн газар эзэмших эрхийг цуцлах эрх зүйн үндэслэл бүрдээгүй байна» гэсэн байв.

Хууль дүрмийг илт уландаа гишгэсэн тэрхүү мэдэгдлээр экс ерөнхийлөгч Н.Энхбаярын хэрэг явдал ид мандаж, олны анхааралд орж ирэх явцад энэхүү «Ремиф» хэмээх компани нь Ерөнхийлөгч асан Н.Энхбаярын хүү Э.Батшугарын компани байсныг мэдээд тус байрны оршин суугчид мэл гайхан цэл хөхөрч, «Арай ч дээ» хэмээн толгой сэгсэрцгээж байжээ.

Тэрхүү улаан цагаандаа гарсан үйлдлийн ард хэн нэгэн дураараа дургигч бизнесмен нөхөр л байгаа байх гэж таамаглаж байсан болохоос бус улсынхаа Ерөнхийлөгчийг байна гэж ард иргэд зүүдлээ ч үгүй гэсэн. Тэр тусмаа шударга үнэн, хуулийн тэгш хэрэгжилтийн төлөө тэмцэгч хэмээн өөрсдийгөө зарлаад байгаа Ерөнхийлөгч асан маань хүүгийнхээ хууль зөрч- сөн үйлдэл, дээрмийн гэмээр үйл ажиллагааг мэдээгүй байдаг нь юу л бол.

Харин өнгөрсөн долоо хоногт хотын захиргаанаас явуулсан шалгалтаар «Ремиф» компани энэхүү газрыг илт хууль зөрчин нэг үгээр хэлбэл, хууль бусаар авсан болох нь тогтоогдож, хураах захирамж гаргахаар болсныг дуулсан оршин суугчид сая нэг тайвширч байгаа гэнэ.

Гэхдээ л улстөрийн хэлмэгдүүлэлтэд өртөөд байгаа гэх Н.Энхбаярыг 2007 онд Ерөнхийлөгч байхдаа «Өргөө» буудлыг сэмхэн хулгайлж орхисон муу нэрт «Ремиф» компанидаа нийслэлийн ногоон байгууламжийн нэгээхэн хэсгийг тасдаад өгчихнө гэж хэн санах билээ.

«Энд тэндэхийн эзэнгүй хашааны цаана энэ мэт хулгай луйвар л нуугдаж байдаг байх даа» хэмээн оршин суугчид ярилцаж байв. Иргэдийн тав тухыг алдагдуулж хүний амь нас авч одох дөхөөд буй энэ газар хууль бусаар зөвшөөрөл олгосон газруудын эхэнд бичигдээд байгаа билээ.

Р.Төгс
Эх сурвалж: “Өглөөний сонин”