“Д.Арвин гишүүн Ард­чилсан намд элсэх гэнэ”… Ийм нэгэн мессеж өчигдөр улс даяар тарж, Ардын намынхан айхгүй гэсэн ч аягүй гэгч нь өнжив. “Д.Арвин явчихвал яана” гэсэн битүүхэн бол­гоомж­лол өнгөрсөн нэг жи­лийн турш тус намыг бүр­хэж байгаа болохоор тэр. Ар­дын намаас МАХН тасарч, Ерөнхийлөгч асан Н.Энхбаяр тусд гарахтай зэрэгцээд л ийм яриа тарж эхэлсэн. Д.Арвин гишүүнийг гурван ч удаа УИХ-д сонгогдсон турш­лагатай парламетч талаас нь бус “айлын хүүхэн” гэх нэр хо­чоор Ардын намынхан гоочилж байсан юм. Энэ нь цаг зэвүүн болохоор хүн болгон урвагч, хулгайч болж харагдана гэдэгтэй л адил. Нөхцөл байдал ийм л байсан. Харин энэ дундуур Д.Арвин гэдэг хувь хүн нэг ч удаа байр сууриа илэрхийлээгүй бөгөөд амаа тас үдэж, эмс хүүхнүүдийн бус эрчүүдийн зангаргаар улс төр хийж чадна гэдгээ батлан харуул­сан юм. Магадгүй энэ нь түүний өм­нөөс өргөх маг­таал мат са­нагдаж болох ч эцсийн дүн­дээ гайхалтай хүчтэй зан чанартай нэ­гэн гэдэг дүгнэлтийг хий­хэд хүргэсэн учраас нуу­гаад яах вэ. Түүний дэргэд Н.Энхбаяртай нийлүүлсэн хардлага сэрд­лэгэд өөрийн­хөө толгойг хут­гаж, ээрч муурч, элдэв яриа гаргаж байсан улстөрч эр­чүүд дэн­дүү инээдтэй харагдаж байсан болохоор тэр.

Ингэж жил орчмын хардлага сэрдлэгийг дуугүй тэссэнийхээ төлөө өнөөдөр тэрбээр УИХ-ын гишүүн болчихоод сууж байна. Нэгэнт МАХН-руу урсах нь тодорхой гэсэн ганц дүгнэлтэд бүх хөзрөө тавьчихсан байсан Ардын намынхан ч түүний эсрэг ёстой ажиллахын дээдээр ажилласан. Тэр бүх арга ажиллагаа нь нэг тойрогт нэр дэвшсэн Баянзүрх дүүргийн Засаг дарга асан Б.Батзоригийг жинхэнэ утгаар нь муухай харагдуулж орхисон. Үндсэндээ Ардын нам ч тэр, ардын хүү гэх Б.Батзориг ч тэр баянзүрхчүүдийн эгдүүг хүргэсэн бөгөөд энэ дунд сонгогч олон Д.Арвин гишүүнийг “Арай л дээр юм” гэдэг үндэслэлээр сонголт хийчих шиг боллоо. Энэ тохиолдолд Ардын намынхан Д.Арвингаа эргэж тойрон, эвийлж энхрийлэх ажилд орох нь тодорхой. Тэгээд байна гэдэг яриа ч мэр сэр гарч байна билээ. Аргагүй шүү дээ, УИХ-д дөрөвдэх удаагаа сонгогдоно гэдэг бол хэр баргийн бүсгүй хүний давж гарч, дарж унах ажил биш нь ойлгомжтой. Гэсэн ч тэр чадлаа. Чадсандаа эрдээд өнгөрсөн долоо хоногийн ажлын сүүлчийн өдөр Ардын намынхнаар жаахан тоглочихсон бололтой юм билээ.

УИХ-ын гишүүн Г.Батхүүтэй тохой залган сууж, Ардчилсан намын бүлгийн гишүүн мэт аяглаад л… Ингэхдээ бас зүгээр ч нэг зүггүйтэхгүй УИХ-ын дарга З.Энхболд хийгээд Ардчилсан намын удирдлагуудтай уулзаж, сэм сэм яриа хийгээд авсан сураг дуулдана. Чухам тэдний хооронд ямар яриа өрнөсөн нь тодорхой бус байгаа ч Ардчилсан намд арай ч бас дуун дээр нь гүйгээд орчихгүй гэдгээ тэр ойр хавийнхандаа зарласан байна билээ. Үүнд нь Ардын намынхан барьц алдаж, УИХ-ын гишүүн Д.Арвинтай онцгойлон уулзах урилга илгээж, илэн далангүй ярилцах хүсэлт ч илэрхийлсэн аж.

Үндсэндээ бол ингэж элэглэх шалтгаан нь Д.Арвин гишүүний хувьд арай илүү их хүндлэл эрснийх гэнэ. Чуулганы танхимд томилж суулгасан суудал нь таалагдаагүй гэдгээс эхлээд эрх ямбаа тунхаглан “Би энд хэрэгтэй юу. Хэрэггүй юу” гэдэг асуудлыг хүртэл тавьж байгаа гэх.  Улмаар “Хүнд хэцүү үед нь тойрогт өрсөлдөж, тэр дундаа өөрийнх нь эсрэг ажилласаар байхад ялалт байгуулчихаад байхад бусдаас илүү хүндэтгэл үзүүлэх ёстой байсан. Товчхондоо толгой бөхийдөггүй юм гэхэд гудайлгах ёстой” гэдэг шаардлага тавьж байгаа нь энэ. Үүнийгээ хатуухан харуулах үүднээс Ардчилсан намын бүлэгт элсэх мэт ойлгуулж, тус намын удирдлагуудтай уулзалт, яриа хийж. Гол нь Д.Арвин гишүүн УИХ-д орж ирснээр Ардын нам 26 гишүүний суудалтай болж байгаа. Харин Ардчилсан намд элсвэл тэд 32 суудалтай болно. Тэгэхээр аль, аль нь нэг ч гэсэн суудлын төлөө “нэхий дээлээ уралцах”-аас ч эмээхгүй болчихсон байх үед нь Д.Арвин гишүүний Ардын намыг айлгаж тоглох төлөвлөгөө амжилттай хэрэгжив бололтой.

Адаглаад л эмэгтэй хүнийхээ хувиар бүхэл бүтэн намын эсрэг тэмцэж, ялна гэдэг айхтар бэрх даваа гэдэг нь ойлгомжтой. Иймд Д.Арвин гишүүний намдаа авчирсан нэг суудалд Ардын нам өр төлбөр төлж, өр сэтгэлийг нь зөөллөх цаг ирсэн нь энэ буй за.