Увс аймгийн Захиргааны хэргийн шүүх өчигдөр УИХ-ын сонгуулийн маргаантай холбоотой хэргийг хэлэлцэж, шийдвэрлэлээ. Шүүх хуралд нэхэмжлэгч АН-ыг төлөөлж, Увс аймгийн АН-ын дарга Д.Цэндсүрэн, өмгөөлөгч н.Лхагважав, гуравдагч этгээдийн өмгөөлөгч н.Энэбиш, н.Нацагдорж, мөн Ч.Хүрэлбаатар, Б.Чойжилсүрэн болон тэдний өмгөөлөгч н.Хаш-Эрдэнэ, н.Батжаргал, н.Хишигбаатар нар оролцсон байна. Хариуцагч СЕХ-ны төлөөлөгч биечлэн оролцоогүй ба тайлбараа бичгээр ирүүлжээ. Шүүх хурал өглөөний  10.00 цагт эхлээд 21.30 цаг хүртэл үргэлжилж завсарласан бөгөөд шүүхийн шийдвэрийг 23.30 цагт уншиж танилцуулсан байна.

МАН-аас нэр дэвшигч Ч.Хүрэлбаатар, Б.Чойжилсүрэн болон тэдний шадар туслах, ухуулагч нар сонгуулийн хууль тогтоомж зөрчин сонгогчдод бэлэн мөнгө тараасан, төрийн албан хаагч болон насанд хүрээгүй иргэнийг сонгуулийн сурталчилгаанд татан оролцуулсан зөрчил гаргасныг шүүхээс тогтоож, УИХ-ын сонгуулын 15 дугаар тойргийн хорооны 2012 оны зургадугаар сарын 27-ны өдрийн 26 дугаар тогтоолыг хүчингүй болгох шийдвэр гаргав. Нэгэнт зөрчил тогтоогдсон учраас үр дагаврын асуудлыг СЕХ өөрийн эрх хэмжээний хүрээнд шийдвэрлэх боломжтой гэж шүүх үзээд нэхэмжлэгчийн зарим шаардлагыг хангахаас татгалзсан байна.

УИХ-ын сонгуулийн хуульд нэр дэвшигч иргэдийн саналыг худалдан авах зорилгоор мөнгө тараасан, төрийн албан хаагч, насанд хүрээгүй хүүхдийг сонгуулийн сурталчилгаанд ашигласан бол нэр дэвшигчийг нэрсийн жагсаалтаас хасахаар тусгасан юм. Нэр дэвшигч ялалт байгуулж, УИХ-ын гишүүний тангараг өргөсөн хойно гэм буруутай нь тогтоогдвол тухайн УИХ-ын гишүүний бүрэн эрхийг хүчингүй болгож, 30-аас дээш хувийн санал авсан дараагийн нэр дэвшигчийг өргөн барих юм. 30-аас дээш хувийн санал авсан дараагийн хүмүүс нь АН-аас нэр дэвшигч Д.Нямхүү, Т.Мэндсайхан нар юм байна. Тиймээс тойргийн хороог татан буулгасан учраас СЕХ ойрын хугацаанд хуралдаж, УИХ-ын хоёр гишүүнийг эргүүлэн татах асуудлыг хэлэлцэнэ гэсэн үг.

Дашрамд дурдахад, өнөөдөр үүнтэй холбоотой бас нэгэн шүүх хурал Баянгол дүүргийн шүүхэд болох юм. Тэр нь УИХ-ын сонгуулийн 15 дугаар тойрог, Увс аймагт Монгол Ардын намаас нэр дэвшигч Б.Чойжилсүрэнгийн туслах Я.Баттогтох,  УИХ-ын Байгаль орчин, хүнс хөдөө аж ахуйн байнгын хорооны референт, Увс аймгийн Оюутны холбооны тэргүүн Ш.Чинбат нарыг шүүх хурал юм. Хурал өнөөдөр 13.00 цагт эхэлнэ. Хуралд шүүгчээр Т.Өсөхбаяр, улсын яллагчаар Г.Гэрэлтуяа нар оролцох юм байна. Тэднийг сонгогчдод мөнгө тараасан, оюутнуудыг авч зугтсан гэх хэрэгт буруутган Тагнуулын ерөнхий газарт мөрдөн шалгасан юм.

Я.Баттогтох, Ш.Чинбат нарыг сонгуулийг  зохион байгуулалттайгаар будилаантуулсан гэж шүүх үзвэл  6-20 жил хүртэлх хугацаагаар хорих ялтай аж.