Шинээр бүрэлдсэн Засгийн газраас гадны хөрөнгө оруулагчид жийрхэх болов.

Оюутолгойн хөрөнгө оруулалтын гэрээг эсэргүүцдэг С.Эрдэнэ, Н.Батбаяр, Д.Ганхуяг гээд гурван сайд Засгийн газарт багтаж, мөн гэрээг эсэргүүцдэг З.Энхболд УИХ-ын дарга болсон. Стратегийн хэмжээний ийм том хөрөнгө оруулалтын гэрээг эсэргүүцэж байсан мулгуу сайд нартай, УИХ-ын даргатай байхад гадны бүү хэл дотоодын хөрөнгө оруулагчид ч хөдлөхгүй. Чухам юугаараа мөнгө босгож ийм том хэмжээний бүтээн байгуулалтыг босгох гээд байгаа юм. Үлгэр яригчдаас энэ бүгдийг юугаараа хийх гээд байгаа юм гэхээр Тавантолгой, Оюутолгой хэмээн бүдэг бадагдуу дуугарахаас үл хэтэрнэ.

Учир нь гадны хөрөнгө оруулагчид энэ Засгийн газарт хөрөнгө оруулах нь аюултай учраас дараагийн сонгуулийн үр дүнг харсан хэрэг. Стратегийн хөрөнгө оруулалтын гэрээ, хот телөвлөлт, бусад дэд бүтцийн олон том асуудлыг санаачилж урагшаа хөдөлгөсөн Монгол Ардын Намыг үгүйсгэж өөрсдөө хийж эхэлж байгаа мэтээр үлгэр ярихаа одоо болимоор байгаа юм. Хамгийн наад захын жишээ гэхэд л Улаанбаатар хотын дарга автомашиныг дугаараар хязгаарлаж хөдөлгөөнд оролцуулах, автобусыг нэгдүгээр эгнээнд явуулж бусад автомашиныг нэгдүгээр эгнээнээс бусад эгнээгээр зорчуулах санал гаргаж, хэрэгжүүлж эхэллээ л гэж байна.

Гэтэл үнэн хэрэгтээ үүнийг Г.Мөнхбаяр даргын үед санаачилж хараахан хэрэгжүүлж амжаагүй байсан зүйл гэдгийг өнөөдөр төр захиргааны байгууллагад ажиллаж байсан бүгд мэднэ. Улаанбаатар хотыг диваажин болгоно, дэлхийн жишиг хот болгоно, тэр ч бүү хэл гучаадхан жилийн дараа Улаанбаатарт олимп зохион байгуулна хэмээн үдэш бүхэн хотын дарга гэх нэг цагаан толгойтой өвгөн үлгэр ярьсаар дасал болж байна.

Нөгөө талаас ярианы эвсэл тааруугаас гадна мэдлэгээр багахан Ерөнхий сайд гэх нэг нөхөр бусдын бэлдсэн үлгэрийг ярьж, нүүрсний уурхай дээрээс шуудай барин ард түмэндээ мэндчилээд ч байгаа юм шиг. Бүр нөгөө талаас жинхэнэ уран илтгэгч “Болор цом”-ын эзэн гэмээр Ерөнхийлөгч нэг нөхөр иргэд бүү хэл өөрсдөө хагас дутуу мэдсэн америк стандарт гэдгийг чөлөө завгүй ярина. Гэтэл УИХ-ын тархин дээр суух нэг давжаа нөхөр олонхийн бүлгийн шууд нөлөөллөөр ажиллаж. бас л хууль хяналтыг тогтооно хэмээн үлгэр шиг юм ярих хэрнээ өөрөө хууль бусаар УИХ-ын дарга болчихсон суух. Манай улсын эрх баригчдын нэг л хоосон дүр зураг, худлаа яриа, сүүлдээ бүр МӨРӨӨДӨЛ гэгч төсөл болон хувирчихаад байгаа юм. Хүн мөрөөдөл тэмүүлэлтэй байх нь сайн ч төрийн эрх баригчид бүхэл бүтэн гүрэн улсын ажлыг мөрөөдлөөр явуулна гэж хэнийх санаанд багтдаг байна вэ.

ЭХ СУРВАЛЖ: МОНГОЛЫН НЭГ ӨДӨР