Одоо­хондоо  түүн шиг эрэлт хэрэг­цээтэй, тэрүүхэндээ  хөөрхөн хэв­лүүхэн, ажлаа гадарлаад байгаа дарга цөөхөн байна. Монголын хэрэг­лэгч­дээр  тохуурхсан үйлдэл бүхэн рүү үсэрч ороод байгаа болохоор ард иргэд “Энэ нөхрийг харин ч нэг байх ёстой байранд нь авч ирээд суул­га­чихлаа” хэмээн ам сайтай байгаа.

Өнөөдөр биднийг хо­хироосоор л байгаа архи, ша­тахууны үнэ, бэлэн гоймон, уут­тай нүүрс, цадигаа алд­сан вьетнам засварчид гээд тулгамдсан асуудал бүрийг зоригтой барьж авч байна. Түүнийг нь  оройдоо цэнхэр дэлгэцээр харж суугаа  ард ир­гэдийн “магнай”  тэнийх нь ч зүй ёсны хэрэг.

Хэрэглэгч олныг шулж мөл­жөөд байгаа архи үйлд­вэр­лэгч, шатахуун импортлогч, нүүрсийг шуудайгаар  биш торонд хийж зараад байгаа луйвар­чид, солонгос гоймонгийн оронд хужаа бэлэн хоол оруулж ирж байгаа гэмт этгээдүүдийн хууль бус үйлдэл бүрийг хангалт­тай ярилаа.

Ер нь ч гудамжинд жаг­саж явахдаа цагаан хоолой бариад хоолойгоо цахирт­тал сайн хашгирдаг байсан эр л дээ. Одоо харин ярьсан бүх­нээ ажил хэрэг болгох хэрэг­тэй байна, О.Магнай дарга аа.

“Ник”, “Магнай трейд”, ”Сод мон­гол” ,“Шунхлай”, М Ойл” зэрэг шатахуун импортлогч моно­полиуд “Бид өнгөрсөн са­руудад алдагдалтай ажил­ласан. Сарын эхнээс “Рос­нефть” шатахууныхаа үнийг нэмсэн тул бид бага­даа л гэхэд 230 төгрөгөөр нэмэхээс өөр аргагүй” гээд гэдийгээд бай­гаа. Харин О.Магнай дарга бүр болохгүй бол 50-60  төг­рөгөөр нэмэгдүүлэхийг зөв­шөөрөх хандлагатай байгаа.

Энүүхэндээ гэхэд нефть импорт­логч монополиуд О.Маг­най даргын хувьд ёстой л толгойны өвчин болсоор удаж буй. Удаж байгаа учир нь эдгээр том компанийн улсад төлөх ёстой 17  тэрбум төг­рөгийн асуудалд ШӨХТГ-ын залуухан дарга эхнээсээ л бууж өгөх бодолгүйгээ мэдэг­дэж Монголын хэрэг­лэгчдээс “онц” үнэлгээ салгасан билээ.

Гэхдээ сүүлийн үед О.Магнай даргын дууны хүч жаа­хан сулраад  урьдын жав­хаатай түргэн хөдөл­гөөнийх нь эрчим удаашраад бай­гаа нь анзаарагдаад эхэллээ.

Бизнес, улстөрийн хүрээнийхнээс олон дарамт, тулгалт ирж байгаа нь тодор­хой.

Хамгийн сүүлд мэдээлэл хийх­дээ “Том ажил хийх гэхээр том дарамттай тул­гарч байна. Ер нь аягүй хэцүү зүйл их байна. Өнөө­дөр хэрэглэгчдийг хохироож байгаа булхай луйвар бүгдийн ард том улстөрчид сууж байгаа болохоор асуудлууд их хүнд байна. Гэхдээ болгож бү­тээхийн төлөө зүтгэнэ” гэж байна лээ. О.Магнай дарга аа, танд хэцүү дарамт, ша­халт бүр ч их ирнэ. Эрчээ сулруулж л болдоггүй юм шүү.

Эх сурвалж: “Өглөөний Сонин”