Өнөө жилийн баяр наадамд зодоглосон хүчит 1024 бөхөөс 10 даван түрүүлсэн С.Мөнхбат аваргын цолны мялаалгад үе үеийн бөхчүүд бөхийн хорхойтнууд хүрэлцэн очжээ.
Монгол Улсын аварга цол хүртсэн “Хилчин” спорт хороо, Хилийн 311 дүгээр анги, Увс аймгийн Баруун туруун сумын харьяат бөх түүний цолны найр энэ удаа нийслэлд үргэлжилсэн байна.
Отгон аваргын цолны найранд 800 гаруй зочин гийчин хүрэлцэн ирсний дотор мэргэжлийн сүмо бөхийн аварга Асашёорюү Д.Дагвадорж хүндтэй байрыг эзэлж байжээ.
Аав ээжийнх суудалтай зэрэгцсэн тэрбээр чамгүй олон тооны ногооноор дүү аваргаа мялаасан аж. Олны ярих нь 10 мянган ногоон бэлэглэсэн гэнэ. Найранд оролцогчид Дагва аваргын зангарагтайг гайхаж байсан ч бас агсамнахгүй байгаасай гэж шивэр авир гэлцэж байсан аж.
Дашрамд дуулгахад отгон аварга С.Мөнхбат нь начин болж дэслэгч, харцага цолонд хүрч ахлах дэслэгч болсон бол энэ наадамд аваргалсанаар хошууч цолтой болж ахлах офицерын эгнээд шилжжээ.