Монголын уул уурхай гол цөм болсон Оюу толгой руу сүүлийн жилүүдэд ажлын хүч ихээр чиглэж байгаа.
Хүн бүр л амьдрал ахуйгаа сайжруулахын тул таатай орчин, найрсаг хамт олон, амьдралд хүрэлцэхүйц цалинтай ажлын байрыг илүүд үздэг.

Хүмүүсийн дунд цалин тэтгэмж сайтай гэж яригддаг Оюу толгойд байдал харин өөр болжээ. Энэ газар монгол ажилчдын үнэлэмж буурч, гадаад, дотоод гэлгүй ажилтнуудын цалингийн тэнцвэртэй байдлыг хадгалах хэрэгтэй гэсэн шаардлага тавьсны хариуд Оюу толгой компанийн төслийн менежментийн мэргэжилтэн Гантуяа ажлаасаа халагджээ.

Нийгэмд бараг хүн бүр мэдэх ч тэр бүр дуугараад байдаггүй зүйлийн талаар шаардлага тавьсны хариуд ажлаасаа халагдсан тэрээр сэтгүүлчдэд хандсан юм.
Тэрээр “Оюутолгойн удирдлагууд Монгол хүмүүсийг өөрсдийнх нь далласан газар ил гарч, далайсан газар нь далд ордог гэдэг бодлоо орхих цаг нь болсон.  Санаа бодлоо нээлттэй илэрхийлсэн, гадаад ажилчдын талаар шүүмж хэлсэн тохиолдолд ажлаас халагдах хүртэл дарамтлах, санамж захиа өгөх, шууд халах зэргээр хандаж байна” гэж Монгол ньюс төвд болсон хэвлэлийн бага хурлын үеэр ярьсан.

Оюутолгойд ажиллаж байгаа гадаад ажилчид нь бакалавр болон түүнээс доош боловсролтой, ихэнхдээ гадаад мэргэжилтнүүдийн танил тал, эхнэр, нөхрүүд байдаг аж. Гэтэл Монгол ажилчдын хувьд англи, америк, австрали зэрэг орнуудын том том сургуулиудыг төгсгөсөн, бакалавр, докторууд байдаг аж.

-Монголчуудад байхгүй туршлага, мэдлэгийг хуримтлуулсан австрали, англи гээд мэргэжилтнүүдээ урьж ажиллуулахыг хүлээн зөвшөөрөлгүй яах вэ. Энэ бол компанийн өөрсдийнх нь асуудал. Гэхдээ гэрээнд хүлээсэн үүргээрээ Оюутолгой компани адил тэнцүү ажил эрхэлж байгаа тохиолдолд гадаад, Монгол ажилчдын цалинг тэнцүү байлгана гэж заасан байдаг. Гэтэл цай зөөж, баримт канонддог ажилтай гадаад мэргэжилтний эхнэр малайз эмэгтэй Монгол ахлах мэргэжилтнээс илүү цалинтай ажиллаж байгаа нь доромжлол биш үү”  гэжээ.

Одоогоор Оюу толгой компанид ажиллаж байгаа монгол ажилчид дунджаар 1,5 сая төгрөгийн цалинтай бол гадаад ажилчдын цалин 30 саяас эхэлж 100 гаруй сая төгрөг хүртэл үнэлэгддэг  байна. Харин Оюутолгойн цалингийн сан нь 400 гаруй сая доллар байдаг гэх бөгөөд үүний ердөө  10 хүрэхгүй хувийг нь Монгол ажилчид авдаг аж.

Цалингийн тэнцвэрт байдлаас гадна ажил олголтын хувьд ч эрс тэрс гэнэ. Монгол хүмүүс Оюутолгойд ажилд орох гэж олон сар хөөцөлддөг байхад гадны мэргэжилтний танил нь ердөө гурван өдрийн дотор ажилд орж, цалингаа 5000 доллараар тогтоолгох тохиолдол байдаг. “Гэтэл ямар ч боловсролгүй, туршлагагүй энэ португали хүнтэй яг адилхан ажил хийдэг Монгол хүн гурван сар хөөцөлдөж байж ороод 1,5 сая төгрөгийн цалин авч байна. Ийм л байна” гэлээ.
Түүнчлэн монгол ажилчдынхаа эрх ашгийн төлөө үнэн мөнийг хэлсний төлөө ажлаасаа халагдсан учир энэ хэргийг шийдүүлэхээр Оюу толгой компанийг шүүхэд өгнө гэдгээ Гантуяа мэдэгдсэн байна.

С.Отгон