Монголын иргэний агаарын тээврийн /МИАТ/ ХК-ийн англи хувилбар буюу МИАТ-ын зах зээлийг булаах зорилготой байгуулагдсан “Mongolian airlines” компанийн 10-12 дугаар бүхий онгоц өнөөдөр өглөө 10.35 цагт Өмнөговь аймгийн Даланзадгад хотоос хөдлөөд 11.50 цагийн үед Улаанбаатар хотноо газардах ёстой байсан ч бууж чадалгүй буцаад нисчээ.
Албаны хүмүүсийн мэдээлж байгаагаар 350-ын 8-9 метр.секунтын хүчтэй салхи онгоцны хойноос салхилж байсан учраас онгоц буух боломжгүй байлаа гэх боловч үнэндээ 24-хэн настай н.Баттулга гэх залуу онгоцны ахмадаар нисч байсан нь онгоц бууж чадалгүй, буцах бас нэг шалтгаан боллоо гэж зарим эх сурвалж хэлж байна лээ.
Учир нь энэ өдөр, яг энэ цагуудад Чингис хаан Олон улсын нисэх буудалд өөр аймгуудаас нисч ирсэн Изинис эйрвэйс зэрэг бусад авиа компаниудын онгоц хэвийн газардаж байсан бол “Mongolian airlines”-ийн онгоц л Улаанбаатарын дээгүүр 30 минут орчим эргэлдэж байгаад буцаад Даланзадгадын Гурван сайхан нисэх онгоцны буудал руу нисчихсэн байна. Энэ нь мэдээж онгоцны ахмадын дадлага туршлага, мэдлэг чадвартай холбоотой нь ойлгомжтой. Бусад авиа компанийн онгоц газардаж чадаад байхад “Mongolian airlines”-ийн л онгоц бууж чадахгүй буцсан нь нэгийг хэлээд өгөв бололтой.
Тэгээд ч 24-хэн нас гэдэг амьдралын болоод ажлын талбарт чамлалттай нас. Тэр тусмаа агаарын тээврийн компанийн тухайд юу юунаас илүү хариуцлагатай байх ёстой атал өнөөдөр  24-хэн настай залууд 50, 60 хүний амь насыг даатгаад нисгэж байгаа нь дэндүү эрсдэлтэй хэрэг юм.
Нөгөөтэйгүүр зорчигчийн билетийн үнийн хувьд Изинис эйрвэйс болоод бусад авиа компаниас харьцангуй өндөр хэрнээ ус, ундаа, печениэс өөр зүйлээр үйлчилдэггүй “Mongolian airlines”-ийг нарийндаа хатсан газар байна гэж үйлчлүүлэгчид нь дүгнэж байв. Бүтэн гурав, дөрвөн цагийн турш онгоцноосоо буулгалгүй авч нисчихээд жижиг аягаар ус, ундаа, алгын дайтай печень зэрэгхэнээр аргацаасанд өлсөж, цангасан хүүхэд, хөгшчүүл бухимдаж байсныг нуух юун.
Ийнхүү байгуулагдаад удаагүй “Mongolian airlines” групп монголчуудын амь насыг эрсдэлд оруулж, үнэгүйдүүлснээрээ зах зээлээ алдах эхлэлийг тавилаа.
Байгуулагдаад хоёрхон жил болж байгаа шигээ боловсон хүчингүй гэж харагдах “Mongolian airlines”группээр амиа хорлох гээгүй л бол үйлчлүүлэхгүй байх нь зүйтэй биз ээ.

mongolcomment.mn