Тийм ч учраас тэр нэг далайлтаар л УИХ-ын гишүүн болчихлоо. Гэхдээ зүгээр ч үгүй хууль зөрчсөн гэх тодотголтой гишүүн болчихож.

УИХ-ын сонгуулийн үеэр түүнд эрүүгийн хэрэг үүсгэн шалгаж байгаа тухай мэдээлэл гарч байсан. Сонгуулийн сурталчилгаа албан ёсоор эхлээгүй байхад худалч хүнд Эрдэнэтийн хүн бүрт бэлэг тарааж, нэгж илгээн бизнесийг нь дэмжихээ илэрхийлсэн гэх. Энэ талаар нь Улсын ерөнхий прокурорын газраас мэдээлж, эрүү үүсгэж байгаагаа зарласан. Харин өнөөдөр асуудал нам жим болчихов. Нийслэлийн Прокурорын газраас хариулт авах гэхээр “Хэлэхгүй” гэж гэдийнэ. Улсын Ерөнхий прокурорын газар нь болохоор “Нийслэл л мэднэ” гээд халгаахгүй. Эцсийн дүндээ асуудал хаана замхарч, хаана нуугдсаныг мэдэх аргагүй болчихож. Энэ бол залуу улстөрчдийн өөдөө гарч ирж байгаа үндсэн нэг фигур. Ах нарынхаа заасан замаар хууль зөрчиж, бусдын итгэл хүндлэлийг үл тоомсорлох арга ухааны илэрхийлэл. УИХ-ын гишүүн Ч.Хүрэлбаатар, Д.Чойжилсүрэн нар өөрөөс нь дээрдээд байх зүйлгүй болохоор арга ч үгүй.

Тэгвэл улс төрийн мөрөөдлөө мөнгө цохиж биелүүлэх энэхүү үндсэн фигурын эсрэг талд өөр нэгэн фигур мөн л өрсөлдөгчийн үүрэг гүйцэтгэж буй. Тэр нь УИХ-ын гишүүн З.Баянсэлэнгэ ба түүний талынхан. Улс төрд амжилт гаргаж л байвал урдуураа улаан хөлтийг ч гаргахгүй болтол нь асуудлыг элдвээр гоочлох ид шид. Тэр хэрээр улс төрд амжилт олж, өөр өөрийнхөө хүссэн өндөр албан тушаалыг эзлэх төлөвлөгөөндөө хурд нэмэх хүчтнүүд. Гэхдээ тэдний нэг онцлог нь О.Содбилэгийн фигур шиг мөнгөөр зодохгүй. Харин хэл, амаараа зодно. Магадгүй нэг талдаа тэд дэндүү азтай. Ерөнхийлөгч асан Н.Энхбаяр гэсэн ганцхан фигурыг тойрч зогсч байгаад л гараад ирчихсэн. Өөр илүү олон сэдвээр ярьж, илүү их мэдлэг хуримтлуулах шаардлага ч байгаагүй. Зүгээр л хууль ёсны яллах дүгнэлтийг хууль бус болгон мушгин гуйвуулж, тэр хэрээрээр ард олны тархийг эргүүтүүлэх үүргээ л сайн гүйцэтгэсэн бол болоо. Өлссөн, даарсан…Тэгээд л гүйцээ, УИХ-ын гишүүн. Эцсийн дүндээ түүний оронд Г.Баасан хатагтай УИХ-д орж ирсэн бол нийгэмд илүү л сайхан харагдах байсан. Учир нь З.Баянсэлэнгийн буруу зүйлийг уриалан байж өмгөөлсөн нэг жилийн тэмцлээс илүү ахмадын тэтгэврийн нэмэлт, унааны хөнгөлөлтийнх нь төлөө тэмцсэн Г.Баасангийн тэмцэл хамаагүй илүү эрүүл бас шударга байсан юм.

Энэ хоёр дүр зураг бол Монголын улс төр улам бүр увайгүй тийшээ хандаж байгаагийн үндсэн илэрхийлэл. Энд зөв зам, зөв арга барил, зөв жолоодлого өдрөөс өдөрт алдагдаж байгаагийн бодит жишээ. Ядахад хамгийн сүүлд Монголын хамгийн зарчимч, хамгийн ирээдүйтэй улстөрчөөр үнэлэгдэх болсон УИХ-ын гишүүн, Боловсрол, шинжлэх ухааны сайд Л.Гантөмөр ч зорилгоосоо ухарч, няцаж байгаа мэт сэтгэгдэл төрүүлэх болоод байгаа. Намынхаа гишүүдийн кофег зөөдөг ордны хүүхнүүдээр яамныхаа газар, хэлтсийн дарга нарынхаа орон тоог бөглөх болсон болохоор тэр. Эцсийн дүндээ улс төрийн эрх ашиг хүнийг ингэж өөрчилдөг үү. Аль эсвэл улс төр угаасаа онцгүй хүмүүсийн хүрээлэл байх ёстой юу гэдэг нь оньсого таавар мэт үлдэх бололтой. Иймд О.Содбилэгээс З.Баянсэлэнгэ хүртэлх улс төрийн солгой фигуруудад амжилт хүсэхэд ч хайран санагдах ажээ.

Г.Отгонжаргал