Өнөөдөр Н.Энхбаярын давж заалдах шатны шүүх хурал болсон. Энэ үеэр түүний өмгөөлөгч С.Нарангэрэлээс тодруулга авлаа.

–    Давж заалдах шүүх хуралд шүүгдэгчийг ямар үндэслэлээр оролцуулаагүй вэ?

–    Ер нь давж заалдах шатны шүүх хуралд шүүгдэгч, яллагдагчийг биечлэн оруулж байгаагүй. Мөн шүүхийн танхим нь жижигхэн, харуул хамгаалалт байхгүй учраас шүүгдэгчийг шүүх хуралд оруулах боломжгүй гэдгийг давж заалдах шүүх хурлын ерөнхий шүүгч Б.Сарантуяа бидэнд мэдэгдсэн.

–    Энэ мэдээллийн талаар өмгөөлөгчийн хувьд ямар бодолтой байна вэ?

–  Монгол Улсын Үндсэн хуульд шүүгдэгч шүүх хуралд биеэрээ оролцон, өмгөөлүүлэх эрхтэй гэж заасан байдаг. Дээрх хуулийг хэрэгжүүлэх үүргийг шүүх биелүүлэх ёстой. Гэвч өнөөдөр шүүх хурлын танхим, хамгаалах хамгаалагч байхгүй гэсэн шалтгаан нь хүний эрх чөлөөг зөрчсөн гэж үзэж байна. Ийм шалтгаанаар шүүгдэгчийг шүүх хуралд оролцуулахгүй байгааг гайхаж байна л даа.

– Н.Энхбаярын биеийн байдал ямархуу байгаа вэ?

– Мэдээж 50 гаруй настай хүн тийм нөхцөлд, өлсгөлөн зарласан учир биеийн байдал нь сайнгүй байгаа нь ойлгомжтой. Түүнд уургийн дутагдал, хөл гарны саажилт илэрч байгаа. Биеийн байдал нь муу байгаа ч өөрийнхөө эрхийн төлөө шүүх хуралд оролцох ёстой юм.

– Шүүх хурал хэвлэлийнхэнд хаалттай байгаа нь зөв үү?

– Давж заалдах шүүх хурлыг хэвлэл мэдээллийнхэнд нээлттэй хийнэ гэж байсан. Гэтэл өглөө  шүүх хурлын ирц бүртгэх болон хаахад сэтгүүлчдэд нээлттэй гэсэн. Энэ нь зөвхөн ард түмэнд шүүх хурал болж байна гэдгийг харуулснаас биш нээлттэй шүүх хурал биш юм.  Мөн сэтгүүлчдийг оруулахгүй нэг шалтгаан нь шүүх хурлын танхим жижиг хэмээн ийнхүү хаалттай хуралдаж байгаа юм.

– Шүүх хурлын үр дүнг хэрхэн хүлээж байна?

– Шүүх хурлын үр дүнг нь харъя. Хэдий шүүх хурлын үеэр шүүгдэгчийн эрх нь зөрчигдөж байгаа боловч монголын шүүх шударга ажиллаж, үнэн зөв үр дүн гарахыг үгүйсгэхгүй юм. Тиймээс асуудлыг урьдчилан таах аргагүй байхаа.

www.times.mn

Д.Долгорсүрэн

Нийслэлийн шүүхийн гадна Н.Энхбаярыг дэмжигчид