Дундговь аймгаас сонгогдож УИХ-ын гишүүн болсон “Мон-Уран”-ы гэх Б.Наранхүү улс төрийн зөөлөн сэнтийд суусныхаа хэргийг дорвитойхон бүтээж байна гэлтэй. Тэрбээр дөрвөн жил гацаатай байсан “Дүнжингарав” худалдааны төвөө ашиглалтад оруулахаар болж, мөн “Анод” банкны дампууралд ихээр нөлөөлсөн найдваргүй зээлээ цагаатгаад амжжээ. Тэрбээр сонгуулийн өмнө хэл аманд өртөхөөсөө зайлсхийж өрөө бага багаар төлж байсан бөгөөд “Дүнжингарав”-ыг ашиглалтад орж, түрээсийн мөнгө төвлөрч эхлэхэд үлдсэн мөнгөө гүйцээж төлөх гэрээг хуулийнхантай байгуулаад байсан юм.

Угаасаа ч “Дүнжингарав”-аас угшилтайгаар тус худалдааны төвийг бариулахын тулд анхнаасаа “Анод”-оос зээл авсан түүний нэр дээр “Анод”-ын төв байр буюу Чингис зочид буудлын замын ард байрлах барилга байжээ. Түүний энэ барилгыг 12 тэрбумаар үнэлэн гадныхан биш төрийн мэдлийнх болгох шийдвэр гарсан байна. Ийнхүү Анодын дампуурлын гол зээлдэгчдийн нэг болох Б.Наранхүүг өрөө цайруулсан гэж үзэж байгаа бөгөөд цаана нь Монголын толгой баячуудын жагсаалтаас бүтсэн урт дараалал байгаа юм. “Анод”-ын гэх хэргийн хүрээнд улсын төсөвт 80 тэрбум төгрөгийг төвлөрүүлэх ёстой ч одоогоор 50 хувьтай байгаа гэж байна.
П.Сүндэр (www.wikimon.mn)