Японы үндэсний бөхийн их аварга Д.Дагвадорж Өвөрхангай аймгийн Есөнзүйл сумын 80 жилийн ойн баяр наадам дээр Монголын үндэсний олон нийтийн радио, телевизийн захирал М.Наранбаатарыг зодсон билээ. Үүний дагуу Д.Дагвадоржид Өвөрхангай аймгийн Цагдаагийн хэлтэс болон Улсын мөрдөн байцаах газраас Эрүүгийн хэрэг үүсгэн шалгаж байгаа юм. Эх сурвалжийн хэлж буйгаар цагдаа нар их аварга Д.Дагвадоржийг энэ сарын 22-нд цагдан хорьсон юм байна. Түүнийг Шүүхийн шийдвэр гүйцэтгэх ерөнхий газрын харьяа 461 дүгээр хорих ангид саатуулан шалгасан юм байна. Д.Дагвадорж цагдаа нарт “МҮОНРТ-ийн захирал М.Наранбаатарт дургүй хүрээд байсан юм. Тэгээд согтуу таараад цохиод авсан байна лээ. Нүүр энэ тэр нь хавдаагүй гайгүй байгаа гэсэн биз дээ” хэмээн мэдүүлжээ. Цагдаа нар их аварга Д.Дагвадоржоос байцаалт авч дуусаад байгаа аж. Мөн түүнийг гадаад руу гарах эрхийг хоёр сараар хасч, өчигдөр батлан даалтад гаргалаа. Д.Дагвадоржийг түүний ах Монгол Улсын аварга Д.Сумъяабазар батлан даалтад авсан юм байна. Их аваргын МҮОНРТ-ийн захирал М.Наранбаатарыг зодох болсон шалтгаан нь өнгөрсөн зургадугаар сард болсон УИХ-ын сонгуульд Сонгинохайрхан дүүргээс нэр дэвшсэн ах Д.Сумъяабазарыгаа телевизээрээ дэмжсэнгүй. Хэдэн минутын ярилцлагын цагаараа оруулж өгсөнгүй гэж гоморхсон явдал аж. Д.Дагвадоржид холбогдох хэрэг удахгүй Прокурорт шилжих юм гэнэ. Тэрбээр Эрүүгийн хуулийн 181 дүгээр зүйл ангиар шийтгүүлэх аж. 181.1-т бусдыг илтэд үл хүндэтгэн хүч хэрэглэх буюу хүч хэрэглэхээр заналхийлж, нийгмийн хэв журмыг ноцтой зөрчсөн бол хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл гурван жил хүртэлх хугацаагаар хорих ял шийтгэнэ гэсэн байдаг.

Э.ХҮРЭЛ