Оймсыг нь гозолзуулаад ч болтугай шударга ёс тогтоох гэж оролдсон үйл явдлаас хойшхи маш олон байр суурь, зөрчилдөөний эцэст экс Ерөнхийлөгч ял сонслоо. Гэвч албан тушаалаа урвуулан ашиглаж улсын мөнгө завшин, авлига авсан хэргийг Н.Энхбаярын талд шийдэхээр зүтгэж яваа түүний нөхөд нийгэмд ч улс төрийн хүрээнд ч асуудал удаж мэдэхээр байна.

Нэг зүйлийг баттай хэлэхэд хэрэг энэ мэт сунжрах тусам Н.Энхбаярыг буруутгах үзэл нийгэмд улам бат сууж байна. Шүүн таслах үйл ажиллагаа заавал олон нийтийн хүсэл сонирхолд үйлчлэх учиргүй тул хэрэг мухарлах болоогүй бололтой. Тийнхүү хэргийг сунжруулах, явцуу хүрээнд байлгах сонирхолтнууд одоо хэрхэн ажиллахыг мэдэхгүй юм. Гэвч “Шударга ёс” эвсэл л гэхэд ард түмний талд биш “ах” Н.Энхбаяртаа илүү хайртай гэдгээ хэлсээр байна. Дээр нь Монголын хамгийн үнэтэй хуульч гэгдэг С.Нарангэрэл түүнийг өмгөөлж байна. Бүр шүүх танхимд байсан яллагч талынхан тэр чигээрээ гавьяат хуульч С.Нарангэрэлээс номын дуу сонсож байсан гэдгийг ч үгүйсгэмгүй.

С.Нарангэрэл өмгөөлөгч “Н.Энхбаярыг шийтгэх бус энгэрийг нь цоолж, шагнах цаг болсон” хэмээгээд байгаа. Түүний ингэж хэлсэн нь олон нийтийн эгдүүцлийг хүргэж байгаа бөгөөд цахим хэвлэлүүдэд буй мэдээлэл, сэтгэгдлүүдээс үүнийг харж болно.

Н.Энхбаярыг цагаатгах гэж буй С.Нарангэрэл өмгөөлөгчийн эрмэлзлэлийн цаад шалтгаан нь юу вэ гэдэг тун сонин. Н.Энхбаяр гадаадын нэр хүндтэй фирмийн өмгөөлөгчийг сая ам.доллараар өөртөө ажиллуулах талаар мэдээлэл гарч байсан. Тэгэхээр С.Нарангэрэл өмгөөлөгчийн өмгөөллийн үйлчилгээ энэ хэмжээнд очсон байхыг хэн үгүйсгэх билээ.

Монголын хуульчдын “эцэг” хэмээгддэг С.Нарангэрэл өмгөөлөгч цаашид хэрхэн ажиллахыг олон нийт амьсгал даран хүлээх болно. Мэдээж гавьяат маань ажилласан нь үнэн юм чинь өмгөөлсний хөлс гэж багагүй юм авах нь тодорхой. Н.Энхбаярын энгэрт одон зүүх үү эсвэл дээлийг нь нөмрүүлэх үү?

Т.Бэх

yanaa.mn