“Лондон-2012” олимпийн наад­мын эмэгтэй хөлбөмбөгийн тэм­цээн уржигдар шөнө эхэллээ. Ингэхдээ нэлээн том асуудал үүсгэ­чихээд байна. Эмэгтэйчүүдийн хөлбөмбөгийн “G” хэсгийн тоглолт эхлэхэд бэлэн болж Колумб, БНАСАУ-ын багийн тамирчид талбайд гарч иржээ. Энэ үеэр хоёр улсын төрийн далбаа талбайн голд байрлуулсан асар том дэлгэцээр гарсан юм. Гэтэл БНАСАУ-ын төрийн далбааны оронд БНСУ-ын далбааг гаргажээ. Ингэснээр ард­чил­сан Солонгосын тамирчид талбайг орхин явцгаасан байна. Хөлбөмбөгчид талбайгаас гарсны дараа зохион байгуулагчид ард­чил­сан Солонгосын багийнхан болон албаны бусад хүмүүсээс уучлал хүсээд тоглолтын өмнөх арга хэмжээг дахин эхлүүлсэн юм. Дээрх шалтгааны улмаас бусад тоглолтын цагийн хуваарьт багагүй өөрчлөлт оржээ. Шотландын Глозго хотын “Хампден парк” цэн­гэл­дэх хүрээлэнд болсон уг тоглол­тод БНАСАУ-ын баг 2:0-ийн харь­цаатайгаар Колумбын багийг буул­гаж авсан. Харин тоглолтын дараа “Хампден парк” цэнгэлдэх хүрээ­лэнгийн хэвлэлийн төлөөлөгч “Тоглолтын өмнөх видео бичлэгт хойд Солонгосын төрийн далбаа­ны оронд өмнөд Солонгосынхыг гаргасан нь бидний алдаа байлаа. Бид хариуцлагагүй үйлдлийнхээ төлөө ардчилсан Солонгосын үндэсний шигшээ баг болон үндэс­ний олимпийн хорооноос нь уучлал хүссэн. Дахин ийм бүдүүлэг алдаа гаргахгүй байх арга хэмжээг бид зохих журмын дагуу авсан байгаа. Зохион байгуулагчдын зүгээс өмнөд Солонгосын далбааг гаргахад хойд Солонгосын багийнхан маш их уурлацгаасан. Ингээд биднийг уучлал хүссэний эцэст талбайд гарч тоглолоо” гэжээ.

Зуны олимпийн гучдугаар наад­мын эмэгтэйчүүдийн хөлбөмбөгт нийт 12 орны баг тамирчид гурван хэсэгт хуваагдан тоглож байгаа бөгөөд аваргууд наймдугаар сарын 9-нд тодрох юм. Уржигдар болсон эмэгтэйчүүдийн хөлбөм­бөгийн тоглолтыг танилцуулъя.

АНУ Францыг 4:2-оор, Япон Канадыг 2:1-ээр, Их Британи Шинэ Зеландыг 4:1-ээр, Швед Өмнөд Африкийг 4:1-ээр, Бразил Камеруныг 5:0-ээр тус, тус хожоод байна. Харин урьд шөнө эрэг­тэйчүүдийн хөлбөмбөгийн тэмцээн эхлээд байгаа билээ.

Д.ЦЭРЭНДОЛГОР