Сүүлийн хэд хоног сонгуулийн дүн эцэслэн гаралгүй олон хүнийг нойргүй хоноход хүргэж байна. Ямартаа ч УИХ-ын 74 гишүүн тангаргаа өргөж, хуучин парламент тарах цаг айсуй. Дийлэнх олонхи болж чадаагүй АН аль хүчинтэй эвсэх талаар өдөр, шөнөгүй хор найруулж буй энэ бүгчим өдрүүдэд шинээр эмхлэгдэх Засгийн газрын бүтэц, бүрэлдэхүүний талаарх бор шувуу аль хэдийнэ нисээд эхэлжээ.

Ерөнхий сайдаар намын дарга Н.Алтанхуяг, УИХ-ын сонгуульд Сүхбаатар дүүргээс сонгогдсон Ерөнхий сайд асан Р.Амаржаргал, “Женко” Х.Баттулга нарын нэр яригдаж байгаа бол өмнөх Хамтарсан Засгийн газрын үед АН-аас Засгийн газарт ажиллаж байсан зарим нэг сайдууд хуучин суудалдаа заларч мэдэхээр байна. Өвөрхангай аймагт тун чиг эвгүйхэн өвдөг шороодсон “АПУ”-гийн Г.Батхүү энэ удаа шинэ Засгийн газарт орж ажиллах хүсэл сонирхлоо намынхаа удирдлагуудад гаргажээ. Өмнө нь тэрбээр ЗТБХБ-ын сайдын албыг хашиж байсан нэгэн боловч өдгөө тэрхүү суудалд тухлах нь хувийн ашиг сонирхолтой нь холбоотой гэнэ.

Учир нь, Г.Батхүү “Энержи Ресурс”-ын хувь эзэмшигч тул өмнөх Засгийн газрын үед шийдэгдэх боломж нь олдоогүй төмөр замын асуудал зэргийг нааштайгаар шийдвэрлэх мэргэн ухааныг олж сэджээ. Гэвч Х.Баттулга гишүүн Ерөнхий сайд болж чадахгүй бол урьд өмнө хашиж байсан сайдын суудалдаа сууж, одоо л нэг санаснаа гүйцээж, юу чаддагаа харуулах цаг болов. Хамтарсан Засгийн газрын үед МАН-ын сайдууд түүний хариуцсан салбарт хөрөнгө оруулалт хийх, ажлыг нь урагшуулах тал дээр ямар ч хөдөлгөөн хийгээгүй. “Мэнгэт” сайд Ц.Нямдорж нартай барьцалдахад хүргэж байсан билээ. Харин тэрбээр хариуцаж байсан ажлаа энэ удаа үргэлжлүүлэн хийх аваас Монголын дэд бүтцийн салбарт томоохон үр дүн цаг алдалгүй гарах боломж бүрдэж байна.
Х.Балт /www.wikimon.mn/