Сонгууль бас л будлиан­таж гэнэ. Ялагдаж, гомдог­сод нь харин өнөөдөр жаг­саал хийх сурагтай.

2008 оны “хар мягмар гараг” гэгддэг 7 сарын 1-ний өдөр яг ийм өрнөлтэйгөөр эхэлж, таван хүний амь нас эрсдэж дууссан. Энэ хэрэг шийдэгдэлгүй дөрвөн жил сунжирсны эцэст цагдаагийн гурван дарга хариуцлага хүлээж, торны цаана суулаа. Үүргээ гүйцэтгэснийхээ төлөө шүү дээ.

Хамгийн сонирхолтой нь 2008 оны 7 сарын 1-нд МАХН буюу өнөөгийн МАН-ын байрны өмнө иргэдийг өдөөн хатгаж, гэмт хэрэгт уриалан дуудсан Бүгд найрамдах намын дарга Б.Жаргалсайхан, иргэний хөдөлгөөний гэх Ж.Батзандан, О.Магнай тэргүүтэй нөхөд энх тунх аж төрж байна. Үймээн самуун гарахад хамгийн ихээр нөлөөлсөн Ж.Батзандан, О.Магнай нар Ганц худагт хоёр сар хоригдсоны эцэст АН-д элсэж, амиа аварсан бол Б.Жаргалсайхан энэ хоёрын дүйвээнд амь хэлтэрсэн.

Сая болсон сонгуулиар Ж.Батзандан АН-аас УИХ-ын сонгуульд нэр дэвшиж, ялалт байгуулчихлаа. Харин Б.Жаргалсайхан нэр дэвшсэн боловч дөрвөн жилийн өмнөх шигээ “цэвэр тавиулж”, сонгуулийн дүнг будлиантуулсан хэмээн хэрүүлээ хийж явна.

Тэгэхээр Б.Жаргал­сай­ханы хувьд сонгуулийн дүнг үнэхээр хүлээн зөвшөөрөхгүй л байгаа юм бол дөрвөн жилийн өмнөх шигээ жагсаал цуглаан хийж, гишүүд, дэмжигчидтэйгээ ялсан намынх нь байрыг шатаачих. Мэдээж Ж.Бат­зандан арай гэж УИХ-д сонгогдсон болохоор Б.Жаргалсайханыг дагаад гүйхгүй нь ойлгомжтой.

О.Магнай ч мөн адил АН нь ялсан болохоор тэгж барьц алдахгүй. Хэчнээн жагсаал цуглаан хийх хорхой нь хатгавч хоёр сар шоронд хоригдон үзээгүйгээ үзэж, шалдаа буусан учраас О.Магнай энэ удаа ээжийн­хээ дэргэдээс холдохгүй. Тиймээс Б.Жаргалсайхан хажуудаа МАХН-ын ги­шүүн Ч.Улаан, МҮАН-ын дарга М.Энхсайхан хоёрыг дагуулах болж байх шиг байна.

БНН-ын дарга Б.Жаргал­сайханы хийсэн хэвлэлийн бага хурлыг харж байхад дагаж, дэмжих хүч хан­галттай байна лээ. “Гурав дахь хүчин” эвсэл, Иргэний зориг Ногоон нам, Иргэний хөдөлгөөний нам, МАХН-МҮАН-ын “Шударга ёс” эвсэл, Монгол Ардын нам, Монголын ногоон нам, Эх орон нам, Эх орончдын нэгдсэн нам, Хөгжлийн хөтөлбөрийн нам гээд бүхэл бүтэн 10 намын гишүүд, дэмжигчид сонгуулийн дүнг эсэргүүцэж байгаа учраас Б.Жаргалсайхан тэднийг уриалахад л хангалттай.

Намуудын дарга нарын гаргасан мэдэгдэлд “Иргэдийн сонгох, сонгогдох эрхийг дээдлэн сонгуулийг шударга, хуулийн хүрээнд явуулах, санал хураах автоматжуулсан системд хандах эргэлзээг арилгах үүднээс улс орон даяар бүх тооллогыг уламжлалт гар ажиллагаагаар хийхийг, тооллогын дүнг баталгаажуулахыг Сонгуу­лийн Ерөнхий хорооноос шаардаж байна” гэжээ. Үнэхээр л хууль зөрчлөө, АН-ынхан санал луйвардлаа гэж байгаа бол ямааны мах халуун дээрээ гэдэг шиг жагс л даа.

Одоо бол түүнд хүч хавсрах томоосоо жижиг хүртлээ олон нам байна шүү дээ. Ил биш ч гэсэн ямар нэгэн аргаар гар хөлөө илгээж, жагсаал цуглааныг үймээн болгож чадна. Ийм туршлагатай нам бий шүү дээ.

Б.Жаргалсайхан, О.Маг­най, Ж.Батзандан нар 2008 онд ялалт байгуулсан МАН-ын байрыг шатаасан. Харин энэ жил АН ялсан болохоор Б.Жаргалсайхан АН-ын байрыг шатаах биз. Угтаа бол АН-д байраа шатаалгах нь ашигтай. Төв шуудангийн урд талын уулзвар дээр байгаа хоёр давхар жижигхэн байраа шатаалгачихаад шинээр баригдах 20 давхар байшингийнхаа хөрөнгийг Засгийн газраас авах хэрэгтэй. Яг МАН шиг. Тиймээс энэ бүхнийг Б.Жаргалсайхан нарийн төлөвлөх шаардлагатай болж байна. Магадгүй төлөвлөчихсөн юм байгаа биз.

Жагс, эсэргүүц, бослого хийцгээ. Энэ бол ардчилсан улсын сонгуулийн үеэр байнга давтагддаг үйл явц. Өөрөөр хэлбэл, жагсаал цуглаан гэдэг бол ардчилсан Монгол Улсад байх ёстой. Иргэд нь жагсаж байна гэдэг Монгол Улсад ардчилал байгаагийн нэг илрэл.

Харин сонгуульд ялагдаж, гомдогсдоос гуйх ганц л юм байна. Битгий л хүний алтан аминд хүрээрэй. 2008 оны 7 сарын 1-ний хар мягмар гарагийг бүү давт. Сонгуульд ялагдаж, санал луйвардуулсан уураа энгийн иргэд, жагсагчдад битгий гаргаарай. Тэд ч гэсэн та бүхэнтэй адил сонгуулийн дүнг эсэргүү­цэж, ялагдагсдыг дэмжиж, ялсанд нь гомдож яваа.

Тийм учраас сураагүй гэх юм биш ялсан намын үүдэнд нь дахиад жагс л даа. Б.Жаргалсайхан дарга аа. Эсэргүүцэл илэрхийлж байгаа нэртэй энд тэнд хэвлэлийн бага хурал зарлаж явахаар зориг гаргаад АН-ын байрыг шатаачихвал илүү үр дүнтэй юм биш үү.
Эх сурвалж: “Өглөөний сонин”

bolod.mn