НИТХ-ын тавдугаар тойрог буюу Багануур, Багахангай дүүрэгт МАН-аас нэр дэвшигч Ц.Сандаг-Очир сонгуулийн хуулийн

дагуу тавдугаар сарын 22-нд Багануур дүүргийн Засаг даргын ажлаасаа чөлөөлөгдсөн ч ажил, албан тушаалаа сон­­гуулийн сурталчилгаанд ашиглан, хууль зөрчсөөр байна. Тодруулбал, тавдугаар сарын 24-нд тус дүүргийн ахмад настан, хөгжлийн бэрхшээлтэй иргэдэд Засгийн газраас нэг сая төгрөг тараах ажилд оролцож, дүүргийн Засаг дарга гэсэн албан тушаалаараа батламж олгосон аж.

Сонгуулийн тухай хуульд зааснаар нэр дэвшигч нь улсын болон орон нутгийн төсвийн хөрөнгийг иргэдэд тараан олгох, шууд зарцуулахтай холбогдсон ажилд оролцох хориотой бөгөөд зөрчсөн тохиолдолд нэр дэвшигчийг нэрийн жагсаалтаас гарах хангалттай үндэслэл болох юм. Гэвч Багануур дүүргийн Засаг дарга Ц.Сандаг-Очир албан тушаалаа ашиглан сонгогчдод нөлөөлөх замаар төөрөгдүүлж, хамтарсан Засгийн газрын шийдвэрээр иргэдэд олгож буй эх орны хишиг, хувийг сонгуулийн сурталчилгаандаа ашиглаж байна.

Түүний хууль бус үйлдэл үүгээр ч зогсохгүй. Нэгэнт албан ажлаасаа чөлөөлөгдөж, жирийн иргэний статусаар намын нэрийн өмнөөс сонгуульд өрсөлдөж буйгаа умартан зургаадугаар сарын нэгэнд Багануур дүүргийн төв талбайд олон нийтийг хамарсан баяр зохион байгуулж, телевизүүдэд ярилцлага өгөн, хүүхдүүдэд бэлэг тараажээ.
Мөн өдөр Багануур дүүрэгт шинээр байгуулсан ёслол хүндэтгэлийн өргөөний нээлтэд оролцож, уг өргөөнд хуримаа хийсэн залуу хосуудад дүүргийн Засаг дарга нэрээрээ дурсгалын зүйл гардуулан бас л олон нийтийн мэдээллийн хэрэгслээр өөрийгөө рекламдсан аж.

Уг нь хуулиндаа “…сонгогчдын саналыг татах зорилгоор хүлээн авалт, дайллага, цайллага, баяр наадам, урлагийн тоглолт зохион байгуулах, түүнийг ивээн тэтгэх зэрэг олон нийтийг хамарсан арга хэмжээ зохион байгуулахыг хориглоно…” гэсэн заалттай бөгөөд зөрчсөн тохиолдолд мөн нэр дэвшигчийг нэрийн жагсаалтаас хасах үндэслэл болно гэж заасан байгаа.
Ийнхүү нэр дэвшигч Ц.Сандаг-Очир хашиж байсан албан тушаалаа ашиглан, сонгуулийн хуулийг илт зөрчсөөр байгаа тул холбогдох тойргийн хороо хуулийн дагуу зохих арга хэмжээг авах биз ээ.

Эх сурвалж: “Өглөөний сонин”