“Би аахилъя, чи үүрэхийг нь үүр” хэмээх үнэг, чоно хоёрын шар тосны тухай үлгэрийг мэдэхгүй хүн ховор. Гэтэл үүн лугаа адил цэрэг, цагдаагийн салбарт сайн нэрийг генерал, хурандаа нар, муу нэрийг жирийн цэрэг, цагдаа нар үүрээд байх юм. Зэвсэгт хүчин болоод цагдаагийн ажилтныг хэдэн төгрөгний цалин авдаг, хэн ямар урамшуулалтай талаар бүгдийг нууцлахыг дээрээс тушаал болгож, бараг л нууцлалын гэрээ байгуулдаг. Тэгсэн атал төрөөс дэмжсэн гэрийн нэг ширхэг унь ч үгүй зүтгэж яваа тэдэнд сэтгэл буй. Гэтэл генералуудад улсаас хаус бэлэглэсэн аж.

Батлан хамгаалахын сайд Ж.Энхбаяр хариуцсан салбараа тэтгээд өгвөл ам сайтай болно гэж амташсан бололтой. Говь-Алтайчуудыг борддог шигээ бодож, энэ ажлаа өөрийн хариуцсан агентлагтаа генералуудаас эхлэхээр шийдэв бололтой. Тэрбээр хоёр хоногийн өмнө 60 гаруй генералуудыг хүлээж аван хавтгай найр хийж, дэслэгч генерал Л.Моломжамц, хошууч генерал Д.Магсаржав гэгчлэнгээр 22 генералын нэр дээр тушаал гарган зуслангийн хаусыг эдлэн газрынх нь хамтаар бэлэглэх, хэрвээ түүнийгээ авахгүй бол дүйцэх хэмжээний мөнгөн шагнал олгохоор болжээ.

Үнэхээр төрийн ажил юм бол ажлын өдрөөр хийх нь яав. Хавтгай найр ингээд ч зогсоогүй бөгөөд генералуудад хоёр нүдний дуран сэлтийг ч мөн бэлэглээд амжжээ. Улс орондоо хийдгээ хийж, гавъяа байгуулсан олон зуун, ахмадууд өнөөдөр ч гэр хороололд зуух пийшингийнхээ асуудлыг бүрэн шийдэж амжаагүй амьдарч л байдаг. Гавъяат гэж хэлээд автобусаар зорчоод, гудамжинд дуу дуулаад явж байгаа ч хүн байна. Тэдэнд эдлэн газар, хаус битгий хэл хашааны банз ч бэлэглэж байсан удаагүй. Энэ ажлыг БХЯ-наас генералуудын нийгмийн халамжийг сайжруулах төсөл гэж тайлбарлана. Хэрвээ тийм л бол Зэвсэгт хүчний салбарыг бүхлээр нь хамруулахгүй, яагаад цол гуншингаар хязгаарлаж, эх орны төлөө тангараг өргөсөн хүмүүсийг ялгаварлана вэ? Генералаас илүү ажлыг мөрдөс зүүж, тангараг өргөсөн, хаусны тухай бодож ч амжаагүй мянга мянган залуус хийж, нуруундаа ачаа үүрч яваа гэдгийг хэн хүнгүй л мэдэх биз ээ.
У.Сарнай (www.wikimon.mn)