МУ-ын иргэн бүр газар эзэмших тухай хууль 2003 онд батлагдаж гэр бүлийн хэрэгцээнд зориулан үнэгүй газар эзэмших хугацаа зааж өгсөн. Энэ хугацааны 2013 оны 5 сарын 1-нээр дуусгавар болох бөгөөд нийслэлд өмчлөх газар иргэдэд олдохгүй байгаагаас хөдөөгийн аймгуудад газар өмчлөх хүсэлтээ ирүүлсэн иргэд маш их болж хөдөө орон нутагт газар үнэд орж эхэлжээ.

Өнгөрсөн жилийн энэ үед 3 сая төгрөгөөр зарагдаж байсан хашаа л гэхэд өнөөдөр зах зээлийн ханш 7 сая төгрөг болсон ажээ. Тэр дундаа хилийн бүс нутгийн орчимд байрлах Дорноговь аймагт газрын үнэ нэлээд өссөн талаар аймгийн иргэд ярьж байна. Хэдийгээр иргэд газар өмчлөх асуудалд ийнхүү цагийг нь тулган оройтож хандаж байгаа  ч гэсэн нөгөө талаас дэд бүтцийн асуудлыг шийдэлгүйгээр газар эзэмшүүлэхээр шийдвэр гаргасан нь хуумгай алхам байсан гэдгийг хэлэх хүмүүс цөөнгүй бий. Улсын хэмжээнд газар өмчлөх асуудал удаашралтай байгаа нь үүнтэй холбоотой байж болох юм.

Дорноговь аймагт л гэхэд өнөөдрийн байдлаар газар өмчлөл 20 хувьтай явагдаж байгаа гэнэ. Ер нь аймгуудын газар өмчлөлийг аваад үзвэл хувиар тооцсон үзүүлэлт тун бага байгаа бөгөөд иргэдийн байршил сайтай хашааны газруудын хувьд үнэ нь тэнгэрт хадаад байгаа ажээ. Хэрвээ дэд бүтцээ зохион байгуулж, ядаж л гэрэл цахилгаантай газар газар олгоно гэвэл иргэд дуртайяа газраа хувьчилж авахад бэлэн байгаа гэсэн саналыг холбогдох албаныханд ирүүлээд байгаа ч энэ асуудлыг хэрхэн шийдэх нь тодорхойгүй байна. Ялангуяа нийслэлээс гадна аж үйлдвэр, уул уурхайн томоохон бүс нутгууд, аймгуудад хүн амын тоо жил ирэх тусам нэмэгдэж байгаатай зэрэгцэн иргэдэд газрыг хэрхэн яаж олгох вэ асуудал давхар урган гарах нь.
Ч.Отгоо (www.wikimon.mn)