АН-ыг хамгийн хүнд үед нь аварч байсан УИХ-ын гишүүн Л.Гүндалай 2000 оноос хойш парламентад тасралтгүй сууж Хөвсгөл нутагтаа дархан цолоо мандуулсан цорын ганц улс төрч болоод байна. Улс төрчийн хувьд туршлагажиж, хашир парламентч болсон тэрбээр энэ жил дахин нэр дэвшиж бүр ялж МАН-ын Д.Лүндээжанцан, Д.Дэмбэрэл, Ц.Нямдорж нарын араас нэрээ бичүүлэх туйлын сонирхолтой байгаа аж.

Тасралтгүй гурван удаа сонгогдсон тэрбээр энэхүү ялалтуудаа нийлүүлэн өөрийн улс төрийн капиталыг бий болгосон тул дахин нэр дэвшихгүй бол өнгөрсөн гурван удаагийн ялалт нь юу ч биш болно хэмээн өөрийгөө бэлдэж, нутаг руугаа ойр ойрхон нисч очин тойрогтоо ихээхэн анхаарлаа хандуулж байна. Харин түүний эсрэг орон нутгийн удирдлагыг гартаа атгасан МАН болоод тус намаас тэрбумтан болсон хоёроос гурван хүн дөрвөн жилийн туршид Хөвсгөлд мөнгөөр бороо оруулаад байна. Одоо Л.Гүндалай юу, МАН уу гэдгийг харах л үлдэв.
Г.Амараа (www.wikimon.mn)