Хаан банкны захирал Саймон Моррис 2011 оны сүүлээр хэдэн төгрөг аваад явсан нь бүү мэд гэнэт л ажлаасаа халагдах болсноо мэдэгдээд яваад өгсөн. Түүний өмнө тус банкинд орлогч захирлаар ажиллаж байсан Марри Бадамс гэгч Австралийн нэгэн компанид 5 сая долларын барьцаагүй зээл олгож мөн л чимээгүйхэн арилаад өгсөн. Гадны улсад бол Монголын иргэн хууль зөрчсөн, эсвэл мөнгө санхүүгийн асуудалд орооцолдсон байлаа гэхэд тэндхийнхээ хуулиар л хатуу шийтгэл амсдаг. Гэтэл манайд гадныхан ирж дураараа дургиж байгаад Монголын хууль цааз, тэр ч бүү хэл тагнуул, цагдаагийнханыг хүртэл үл тоомсорлон арилаад өгдөг болжээ. Ийм явдлуудын нэгэн тод жишээ нь Алтан Дорнод Монголын хэргээр үргэлжилдэг. Тэгвэл Дэлхийн санхүүгийн шилдэг байгууллага болсноо зарлаж олон улсын сэтгүүлд нэрээ бичүүлснээ хэдэн сар зад рекламдсан Голомт банкны удирдлагуудыг Тагнуулын ерөнхий газар болон холбогдох албаныхан шалгаж эхлээд байна.

Энэ удаад бас л гадаадын нэгэн иргэнтэй холбоотой бөгөөд тодруулж хэлбэл Беларуссын нэгэн иргэн Монголын арилжааны банкуудаар дамжуулан мөнгө угаасан гэх мэдээлэл байгаа юм. Энэ банк нь Голомт банк байх өндөр магадлалтай бөгөөд Беларуссын иргэнийг Монголоос гарах гэж байхад нь хил дээр саатуулжээ. Тэрбээр Монголд байцаагдаж байгаа агаад хэрэг нэг тийш болох болоогүй байгаа юм байна. Түүний өгсөн мэдүүлгээр бол Голомт банкнаас гадна дахиад өөр нэг банк байх магадлалтайг холбогдох албаныхан ярив. Ямартаа ч Голомт банкны захирал Жон Финиган болон Г.Ганхуяг, Г.Ганболд нарын хэд хэдэн хүмүүс хууль хяналтын байгууллагаар явж байгаа нь тодорхой бөгөөд энэ явдал эрүүгийн хэрэг үүсч магадгүй шатанд хүртэл даамжирчээ. Гадны иргэд Монголоор дамжуулан мөнгө угаах явдал мэр сэр гарсаар байгаа бөгөөд энэ талаар тагнуулынхан мөрдөн шалгаж, сэжиг бүхий  иргэдийг саатуулсан нь энэ хэргийг илрүүлэхэд тус болжээ. Ямартаа ч арилжааны банкны хүлээсэн үүрэг хариуцлагын дотор сэжиг бүхий гүйлгээний баримтыг илтгэж хууль хяналтыханд мэдэгдэн, мөн мөнгө угааж байж болзошгүй мэдээллийг цаг тухайд нь мэдээлэх явдал багтдаг юм байна. Олон улсад бол ийм хэргийг терроризмыг санхүүжүүлэхтэй холбоотой байж магадгүй хэмээн үздэг. Харин манай улсын хувьд уйл явдал хэрхэн өрнөхийг харах л үлдлээ.
Г.Жаргал (www.wikimon.mn)