Бага насны охидыг садар самуунд уруу татдаг бүлэг байдаг гэх мэдээлэлд нэр нь дурдагдсан “Мон-Уран” компанийн захирал Б.Наранхүү “Нэр хүндэд халдлаа” хэмээн “Зууны мэдээ” сонины сэтгүүлч Д.Болормааг шүүхэд өгөөд байгаа. Энэ хэргийн шүүх хурал 2011 оны 8 сард болж, сэтгүүлч Д.Болормааг Сүхбаатар дүүргийн шүүхээс цагаатгаж байсан. Харин Мон-Ураны Б.Наранхүү дахин давж заалдах шатны шүүхэд гомдол гаргаж Нийслэлийн шүүхэд хандсанаар энэ хэрэг дахин эхэлсэн юм. Ингэснээр ч үл барам Сүхбаатар дүүргийн шүүгчийн тогтоолыг Нийслэлийн шүүх хүчингүй болгож дахин шүүхээр энэ хэрэг хэлэлцэгдэх болсон.

Энэ дагуу сар гаруйн өмнө болсон шүүх хуралдаанаар Сүхбаатар дүүргийн шүүгч Ш.Төгсгэрэл  “Б.Наранхүү нарыг шалгах шаардлагатай. Үүний дараа Д.Болормаагийн асуудлыг авч хэлэлцэх нь зүйтэй” хэмээн хэргийг нэмэлт мөрдөн байцаалтад буцаахаар шийдвэрлээд байсан. Харин Сүхбаатар дүүргийн хяналтын прокурор Ш.Баярбилэг дээрх шийдвэрийг эсэргүүцэн Нийслэлийн шүүхэд гомдол гаргасан аж. Прокурор Ш.Баярбилэгийн эсэргүүцлийн дагуу Сүхбаатар дүүргийн шүүгч Ш.Төгсгэрэлийн шийдвэр зөв эсэхийг Нийслэлийн шүүх дахин хэлэлцэх гэж байна. Тодруулбал, энэ сарын 15-нд буюу маргааш уг шүүх хурал Нийслэлийн шүүхэд болохоор товлогджээ. Хэрвээ энэ хэрэг дахин шалгагдахаар болвол Мон-Ураны Б.Наранхүүгийн сонгуульд нэр дэвших ажил талаар өнгөрч тэрбээр хууль хяналтынханд байцаалт өгөх ажилтай болох юм. Маргааш энэ хэргийн шүүх хурал хэрхэн болсныг эргэн мэдээлэх болно.
Г.Тэгшжаргал (www.wikimon.mn)