Төрийн байгууллага хүртэл хууль зөрчиж түмний халаас руу гараа шургуулдаг энэ тогтолцоог халах цаг болсон гэдгийг ар араасаа болж байгаа олон үйл явдлууд хангалттай баталж байна.

Ус сувгийн удирдах газрын дарга Б.Пүрэвжав хэмээх нөхөр  томилогдсноосоо хойш санхүү, аж ахуй гээд л хамаг албан тушаалыг ах дүүсдээ өгч гэр бүлийн мөнгө идэх арга хэрэгсэл болгосон байна. УСУГ төвлөрсөн усан хангамжийн салбар ганц монополь гэдгийг 8 настай хүүхэд ч хэлнэ. Ийм монополь компаниудад захирлын тушаал хууль байдагийн адилаар 2000 онд даргын тушаалаар цэвэр бохир усны үнийн тухай ажил хэрэгжүүлж эхлэн тэр үеэс албан газар хүн амд нийлүүлж буй цэвэр бохир уснаас 1 метр куб дутамд 5 төгрөгийн нэмэгдэл авч усны нөөц санг бүрдүүлэхээр болж. Харин Улаанбаатар хотын төсөвт нийлүүлдэг байсан энэ мөнгө чухам юунд зарцуулагддаг нь тодорхойгүй байгааг УСУГ-ын дарга овжиноор ашиглан 2006 оноос энэ санг өөрийн нэр дээр болгож төвлөрүүлжээ.

Шударга өрсөлдөөн хэрэглэгчийн төлөө газрын даргаар ажиллаж байсан Д.Мандах шийдвэр гаргаж олон улсын худалдааны тухай хуулийг зөрчиж байж компани аж ахуй нэгжүүдэд шалгалт хийсний нэг нь УСУГ юм. Хэрвээ энэ шалгалтыг хийгээгүй бол дахиад хэдэн жил ч дараалан энэ явдал даамжирч мэдэхээр байсныг хэлэх нь зүйн хэрэг болов уу. Усны нөөцийн санд иргэд, аж ахуй нэгжүүдээс авсан мөнгийг олон жил татан төвлөрүүлж байгаа нь “Өрсөлдөөний тухай” хуулийн 6.1.2 ийг зөрчсөн явдал болжээ. Ийнхүү энэ хэрэг 2011 оны 12 сарын сүүлээр БЗД-ийн захиргааны хэргийн шүүхэд шилжсэн байна. Шүүх хурал 2012 оны 1 сарын 25 нд болсон бөгөөд шүүх хурлын явцаас сонирхвол: УСУГ-ыг 25 сая 800 мянган төгрөгөөр торгох шийдвэр гарчээ. 2000 оноос хурааж эхэлсэн 5 төгрөг 2006 оноос хойш УСУГ-т шилжсэнээс хойш нийт 1 тэрбум 88 сая 600 мянган төгрөг төвлөрсөн байна. Энэ нь хууль бус орлого юм. Энэ орлогыг улсын орлого болгох шийдвэр, мөн мөнгөн торгуулийн шийдвэр шүүх хурлаас гарчээ. Ийнхүү УСУГ-ын олон жил дараалан иргэд аж ахуй нэгжүүдийг шулж өөрсдөө мөнгийг нь завшиж байсан хэрэг олон нийтэд ил тод болж байна. Харин хэвлэл мэдээллийн байгууллагууд энэ талаар төдийлөн шуугиагүй бөгөөд манай сайт энэ талаарх мэдээллийг баттай эх сурвалжийн баримттайгаар та бүхэнд хүргэлээ.

Эх сурвалж: www.duulian.mn