“Петро Чайна Дачин Тамсаг” компанитай холбоотой анхаарал татсан мэдээллүүд  ер нь байнга гардаг.  Тус компанийн талбайд туслан гүйцэтгэгчээр ажилладаг “Зөв боломж” компанийн ажилтнууд үл мэдэгдэх шингэн зүйлийг согтууруулах ундаа гэж уусны улмаас хордож, дөрвөн  хүн нас барсан хэрэг гарсан.

Тэгвэл   Матад сумын нутаг дэвсгэрт газрын тосны чиглэлээр үйл ажиллагаа явуулдаг БНХАУ-ын хөрөнгө оруулалттай “Петро Чайна Дачин Тамсаг”, “Буман Олз” зэрэг компаниуд  Дорнод аймгийн ИТХ-ын төлөөлөгч П.Гэрэлбаатар энэ сарын 6-ны өдөр өгсөн сануулгыг үл тоон тээвэрлэлтийн үйл ажиллагаа явуулсаар байгаа аж. Чухам яагаад тийм шаардлагыг тус компаниудад тавиад байна гэхээр  Малын гоц халдварт шүлхий өвчин Сүхбаатар аймгийн Эрдэнэцагаан сумаас дамжин Дорнод аймгийн Матад суманд гарч, сумын засаг даргын захирамжаар онц байдал зарлан хорио цээрийн дэглэм тогтоогоод байгаа юм.

Түүнчлэн Дорнод аймгийн ИТХ-ын төлөөлөгч П.Гэрэлбаатар дээрх компаниудад дахин албан бичиг илгээж тээвэрлэлтээ зогсоохыг  сануулсан байтал, үл тоож байгаа аж.

Хэдийгээр өөр улсын хөрөнгө оруулалттай компани байж болох ч, Монгол Улсын нутаг дэвсгэрт үйл ажиллагаа явуулж байгаа бол хуулийг мөрдөх ёстой. Ялангуяа малын гоц халдварт өвчин дэгдчихээд байхад голомтот газар үйл ажиллагаа явуулсаар байгаа нь болчимгүй хэрэг юм.

Эх сурвалж: Шуурхай.мн