С.Зориг агсны амийг хөнөөсөн хэргийн шүүх хурал Шүүхийн  шийдвэр гүйцэтгэх ерөнхий газрын харьяа Хорих 461-р ангид хаалттай болж байна.  Шүүх хурал  товлогдсон цагаасаа хоцорч эхлэсэн.Хурлыг Ерөнхий шүүгч М.Алдар даргалж, шүүгчээр Б.Мөнх-Эрдэнэ, С.Оюунчимэг нар оролцож байгаа бол өмгөөлөгчөөр Л.Мөнхтөр, С.Оюунцэцэг, Д.Дашдорж, Л.Энхсайхан, улсын яллагчаар Б.Батжаргал, Ж.Сандагсүрэн нар оролцож байна. Анхаарал татсан мэдээлэл байгаа нь Г.Чулуунбат, н.Давааням гэх хүмүүс  гэрчээр оролцож байгаа аж. За мөн хоёр шинжээч оролцож байна.

 Уг хэргийн шүүх хурал өнгөрсөн долоо хоногийн лхагва гарагт болсон ч шүүгдэгчдийн өмгөөлөгчийн зүгээс хавтаст хэрэгтэй бүрэн танилцах, мөн  зарим гэрчийг заавал шүүх хуралд оролцуулах хүсэлт гаргасны дагуу хойшлоод байсан юм.

Тэгэхээр гэрч Г.Чулуунбат, н.Давааням нь шүүгдэгчдийг гэмт хэрэг үйлдээгүй гэдгийг баримттайгаар хэлж ярихаар шүүхийн танхимд ирсэн бололтой юм.

С.Зориг агсны амийг хөнөөсөн хэргийг улстөрийн аллага биш гэж байгаа ч “Төрийн нууцад хамаарах баримт, материал хэрэгт авагдсан” гэх шинжээчийн дүгнэлт гарсан учир маш нууц гэх тодотгол дагаж байгаа юм.

Хэрэгт  сэжигтнээр  татагдаад байгаа Ц.Амгаланбаатар, Б.Содномдаржаа, Т.Чимгээ нар нь Орхон аймгийн харъяат  иргэд.  Б.Содномдаржаа, Т.Чимгээ нарын ар гэрийнхэн хилс хэрэгт хэлмэгдүүлж байна гэх мэдээллийг хэвлэлийнхэнд өгсөн юм. Шүүгдэгчдэд Эрүүгийн хуулийн 91 дүгээр зүйл буюу Хүнийг санаатай алах зүйлээр ял тулгаад байгаа. Тодруулбал, 91.2.1, 91.2.4, 91.2.6, 91.2.10, 91.2.11, 91.2.12, 91.2.13, 91.2.15 гэсэн зүйл ангиар эрүүгийн хэрэг үүсгэсэн ялын дүгнэлт үйлдсэн байгаа юм. Тэдгээрийг нь танилцуулбал,

91 дүгээр зүйл. Хүнийг санаатай алах

91.1.Энэ хуулийн 91.2-т заасан хүндрүүлэх нөхцөл байдалгүйгээр хүнийг санаатай алсан бол арваас дээш арван таван жил хүртэл хугацаагаар хорих ял шийтгэнэ.

91.2.Хүнийг:

91.2.1.шунахайн сэдэлтээр;

91.2.4.захиалгаар;

91.2.6.өөр гэмт хэргийг нуун далдлах буюу хялбарчлах зорилгоор;

91.2.10.хүнийг санаатай алах гэмт хэргийг давтан үйлдсэн /энэ хуулийн 93 дугаар зүйл хамаарахгүй/;

91.2.11.бүлэглэж, урьдчилан үгсэж тохиролцсон бүлэг, зохион байгуулалттай бүлэг, гэмт бүлэглэл;

91.2.12.онц харгис хэрцгий аргаар;

91.2.13.нийтэд аюултай аргаар;

91.2.15.хохирогчийг биеэ хамгаалж чадахгүй байгааг мэдсээр байж гэсэн заалтууд байгаа юм. Ялын эдгээр зүйлчлэл нь Санжаасүрэнгийн Зориг агсны амийг хөнөөсөн хэргийг улс төрийн зорилгогүй хэрэг гэж хуулийнхан үзжээ гэж дүгнэхэд хүргэсэн юм.

Эх сурвалж: Шуурхай.мн