Хүйтний эрч чангарсантай холбогдуулан гэр хорооллын амины орон сууц, байшин, гэр шатах дуудлага эрс нэмэгдсэн байна.

Тухайлбал, ХУД-т таван настай эрэгтэй Г, дөрвөн настай эмэгтэй Н, долоон сартай эрэгтэй Ц нар гэртэйгээ шатаж нас барсан харамсалтай хэрэг гарчээ. Мөн Төв аймгийн Мөнгөнморьт сумын нутагт өвлийн сууц шатаж тус суманд оршин суух 74 настай эрэгтэй Т, 27 настай эмэгтэй О, гурван настай эмэгтэй А нар шатаж нас барж, таван настай эмэгтэй Э нь түлэгдэж гэмтжээ.

Хэргийг харьяа цагдаагийн хэлтэст шалгаж байгаа аж. Тиймээс иргэд гэр орон сууцаа галлахдаа түлшийг хэтрүүлэн хэрэглэхгүй, гэмтэлтэй пийшин зуухыг ашиглахгүй байхыг сэрэмжлүүлж байна.

Мөн яндангаа галд үл шатах материалаар дулаалж, тамхи, шүдэнзийнхээ галыг бүрэн гүйцэд унтраах, галтай үнс, нурмыг ил задгай асгахгүй, гэр ахуйн цахилгаан хэрэгсэл, шугам сүлжээний ашиглалт угсралтын дүрэм зааврыг зөрчихгүй, гэрийн цахилгаан шугамын ачааллыг хэтрүүлж хэрэглэхгүй байх, бага насны хүүхдийг харж хандах, асрах хүнгүй орхихгүй байхыг онцгойлон анхааруулж байна.

Эх сурвалж:Zaluu.com