2013 оны 4 дүгээр сарын 30-ны өдөр Байгаль орчин, ногоон хөгжлийн сайд  А-132 тоот тушаал гаргаж ойгоос төмөр замын дэр мод үйлдвэрлэх зорилгоор мод бэлтгэхийг хориглосон тушаал гаргасан нь өнөөдөр төмөр замын аюулгүй байдалд сөргөөр нөлөөлж, ноцтой осол аваар гарах нөхцөлийг бүрдүүлэхэд хүрчээ. Энэ тушаал нь нэг талдаа байгаль орчныг хамгаалах талдаа сайхан сонсогдож байсан  ч нөгөө талдаа олон зуун хүний амь настай холбоотой асуудал хөндөгдөж байгааг тухайн үедээ байгаль орчинд ээлтэй “ногоон” сайд анзаарч мэдрээгүй болов уу. Тэрчлэн эрхэм сайд төмөр замд шаардлагатай дэр модыг бүгдийг нь төмөр бетон дэрээр орлуулж болох мэтээр ойлгосон байж ч мэдэх юм. Учир нь өнөөдөр ч төмөр замын мэргэжлийн бус хүмүүс ийм ойлголттой байдаг.

        Монгол улс хойд хилээсээ өмнөд хил хүртэлх 1110 км гол зам болон уг замаас салаалсан салбар замуудтайгаа нийлээд 1800 гаруй км урт төмөр замтай юм. Энэ зам дээгүүр дайран өнгөрч байгаа ачаа болон зорчигч тээврийг “нуруун дээрээ үүрч” байдаг төмөр замын нийт дэрний тоо 4,366,805 ширхэг байдгийн 3,148,996 ширхэг нь модон дэр байдаг аж. Өөрөөр хэлбэл 1,217,809 ширхэг нь л төмөр бетон дэр байна гэсэн үг.

     Цаашдаа төмөр замын дэр модыг төмөр бетон дэрээр орлуулахад 15-20 жил шаардлагатай гэсэн тооцоо гарчээ. Гэтэл өнөөдөр яаралтай солихгүй бол төмөр замын аюулгүй байдалд нөлөөлж осол аваар гарах хэмжээнд хүрсэн дэр модны тоо 1 сая ширхэгт дөхөөд байгаа нь аюулын харанга дэлдэж байна. Энэ асуудлыг тоохгүй хаявал цаашдаа ч энэ тоо өснө. Үүнийг төмөр бетон дэрээр орлуулж сольё ч гэсэн тийм хүчин чадал алга.

     Тэрчлэн галт тэрэгний хөдөлгөөний аюулгүй байдлыг хангах үүднээс төмөр бетон дэр тавих боломжгүй газрууд ч байдаг аж. Бага радиустай тахир замуудад, овойлт үүсч хөлддөг эмзэг хөрстэй газруудад, элс хайрган чигжээстэй гол замуудад гээд манай орны эрс тэс уур амьсгалыг модон дэр л тэсч давж гардаг аж.  Тийм болохоор цаашдаа ч эдгээр замуудад модон дэр тавихаас өөр арга байхгүй.

      Төмөр замын хөдөлгөөний аюулгүй байдалд сөргөөр нөлөөлж, ноцтой осол аваар гарах нөхцлийг бүрдүүлээд байгаа Байгаль орчин ногоон хөгжлийн сайдын 2013 оны тушаалыг нэн яаралтай эргэн харж өөрчлөхгүй бол олон зуун хүний амь насны асуудал ч яригдаж мэдэхээр хэмжээнд хүрснийг Ерөнхий сайд та анхааралдаа авах цаг болжээ.

Шуурхай.мн