ШШГЕГ-ын удирдлагууд цол, албан тушаал хоёроор тоглож байна гэх мэдээллийг хэвлэлүүд өнгөрсөн оноос эхлэн бичиж байгааг эрхэм уншигчид анзаарсан болов уу. Асуудалгүй, но-гүй зүйлийг хэвлэлийнхэн нийтэд дэлгээд байдаггүй. За тэгвэл яах аргагүй өөрсдийн үйлдлээрээ хэвлэлийнхний анхааралд ороод байгаа хүмүүсийн нэг бол Шүүхийн Шийдвэр Гүйцэтгэх Ерөнхий Газрын Захиргаа  удирдлагын газрын дарга М.Алтан-Очир юм. Б.Билэгтийн үед нутгийн зөвлөлийнхөө зарим хүнээр яриулж, юм атгуулж байж дарга болсон гэгддэг тэрбээр эхнэртээ 6 сарын дотор хурандаа цол өгч эмэгтэйчүүдийн хорихын даргаар томилж хууль зөрчсөн асуудал нь өнгөрсөн хугацаанд нэлээд асуудал дагуулсан гэхэд болно. Тэгвэл түүнд өөр олон асуудал байдаг талаар мэдэх хүмүүс нь хэлж байгаа юм. Тухайлбал,  нутгийнхаа Алимаа гэх жаахан охинд 1 жилийн дотор ахлах дэслэгчээс хурандаа цол хууль бусаар олгосон.  Хэнтийн хорихын дарга байхдаа зээр олноор агнаж,хоригдлын хоолонд өгч яг тэр тоогоор албаны малыг хувьдаа авсан. Мөн Хэнтийн хорихын 3 мянга  шахам малын төлийг удаа дараа хувьдаа завшиж, өөрөө 5 мянган малтай болж  эхнэртээ ланд 200 авч өгсөн.  Хэнтийн хориход хоригдлын ар гэрээс мал авч, хувьдаа ачааны машин завшиж, сийлбэртэй гэр хийлгэж дамласан. Өөрийн нууц харьцаатай эмэгтэй, мэргэжлийн бус хүмүүсийг төв газар хорих ангиудад өндөр албан тушаал замбараагүй олгосон гэхчлэн олон асуудлыг нь хэлж яригсад цөөнгүй байна.

Ер нь бол хариуцлагатай албан тушаал хашиж байгаа хүний нэрэнд наалдуулаад л баймааргүй элдэв олон асуудлын талаар эх сурвалжууд хэлж ярьдаг гэдгийг тодотгоё.

Түүнчлэн эхнэрийгээ даргын сэнтийд лоббидсон гэгддэг асуудлынх нь талаар тодруулан хүргэе. Энэ талаар “Өглөөний сонин”-нд нийтлэсэн байдаг юм. ШШГЕГ-ын даргын тушаалаар өнгөрсөн дөрөвдүгээр  сарын 18-ны өдрийн Б/458 тоот тушаалаар Хорих 407 дугаар ангийн даргаар дэд хурандаа Д.Уранчимэг гэх эмэгтэйг томилсон байдаг. Тэр эмэгтэй бол М.Алтан-Очирын эхнэр юм. Уг нь тэр эмэгтэйг албан тушаалд томилохоосоо өмнө АТГ-руу хувийн ашиг сонирхолын урьдчилсан мэдүүлгийг нь хянуулахаар явуулах ёстой. Гэтэл тэд мэдүүлгийг явуулаагүй атлаа тус хорих ангийн даргаар Д.Уранчимэгийг томилсон нь Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 23 дугаар зүйлийн 23.5 дахь хэсэг /Нийтийн албанд томилогдохоор нэр дэвшсэн этгээдийн хувийн ашиг сонирхлын урьдчилсан мэдүүлгийг томилох эрх бүхий байгууллага, албан тушаалтан хүлээн авч Авлигатай тэмцэх газарт хүргүүлнэ/ гэж заасныг зөрчжээ. Угтаа бол Д.Уранчимэгийг тухайн албан тушаалд томилсныхоо дараа тус газар руу мэдүүлгийг нь хянуулахаар явуулсан гэсэн үг.

Харин АТГ-аас уг асуудалд хуулийг хэрхэн яаж зөрчсөн, ашиг сонирхлын зөрчил байгаа эсэхийг тогтоохдоо  “Хууль зөрчин томилсон шийдвэрийг хүчингүй болгох, ашиг сонирхлын зөрчилтэй гэж үзэн шалгах, олон нийтийн зүгээс ашиг сонирхлын гэж ойлгогдохуйц нөхцөл байдал үүсэх, мөн хувийн ашиг сонирхлын мэдүүлгээ гаргаж өгөөгүй албан тушаалтанд хуулийн дагуу хариуцлага хүлээлгэх үндэслэлүүдийг бий болгожээ. Түүнчлэн Д.Уранчимэгийн нөхөр М.Алтан-Очир нь ШШГЕГ-ын Захиргаа удирдлагын газрын даргаар ажиллаж байгаа нь албан үүргийн хувьд нэг нь нөгөөдөө шууд захирагдах буюу шууд хяналт тавих, эрхлэх асуудлын хүрээнд шууд болон шууд бусаар нөлөөлөх боломжтой. Мөн олон нийтийн зүгээс ашиг сонирхлын зөрчилтэй гэж ойлгогдохуйц тул тухайн албан үүргийг гүйцэтгэхэд илт ашиг сонихрлын зөрчил үүсч болох нөхцөл байдал тогтоогдож байна. Цаашид дээрх хуульд заасны дагуу нийтийн албанд томилогдохоор нэр дэвшсэн этгээдийн хувийн ашиг сонирхлын урьдчилсан мэдүүлгийг тус газраас хянан үзсэний дараа тухайн албан тушаалд томилоход анхаарч ажиллана уу” гэсэн албан бичгийг тавдугаар  сарын 12-ны өдөр ШШГЕГ-ын Захиргааны удирдлагын газрын Хүний нөөцийн тасгийн дарга хурандаа А.Гэрэлт-Очид хүргүүлсэн байдаг. Тэгэхээр АТГ-аас тус газарт хүргүүлсэн албан бичгийн утга агуулга нь нөхрийнхөө удирдлага доор эхнэр нь ажиллавал эрхлэх асуудлын хүрээнд шууд болон шууд бусаар нөлөөлөх боломжтой гэж үзсэн гэж ойлгогдож байгаа юм.

Хачирхалтай нь, АТГ-аас Д.Уранчимэгийг хууль бусаар томилсон байна гэдгийг нь анхааруулсаар байхад М.Алтан-Очирын эхнэр хорихын даргаар ажилласаар байсан нь хэвлэлийнхний анхаарлыг татсан байдаг.

Эх сурвалж: Шуурхай.мн