Уламжлал ёсоор хуралддаг Засгийн газрын энэ долоо хоногийн хуралдаанаар төсөв хөрөнгөтэй холбоотой хэд хэдэн асуудлыг хэлэлцэн шийдвэрлэсэн. Тодруулбал, 70-аас дээш настай өндөр настангуудад “Насны хишиг” олгох тухай болон удтал хүлээлт үүсгээд буй хүүхдийн мөнгийг энэ сараас эхэлж олгож эхлэхээр шийдвэрлэв.

Тэгвэл энэ долоо хоногийн засгийн хуралдаанаар хэлэлцэгдсэн төсөв хөрөнгөтэй холбоотой хамгийн чухал асуудал нь ирэх олны төсвийн асуудал байв. Засгийн газар Монгол Улсын 2017 оны төсвийн төслийг хэлэлцээд холбогдох өөрчлөлт оруулж Засгийн газрын дараагийн хуралдаанаар хэлэлцэхээр болсон юм.

Улс эх орон эдийн засгийн хүнд байдалд орсон энэ үед хэрхэн аврах, яаж сэргээх, эдийн засгаа эрчимжүүлж эрүүлжүүлэх талаар эрх баригчид төдийгүй эдийн засагчдын толгойны өвчин боллоо. Манай орны төсвийн нөхцөл байдал хүндэрсэн, ирэх жилээс төлж эхлэх бондын эргэн төлөлт, замбараагүй, сахилга батгүй хэтэрхий үрэлгэн төсөв зэрэг олон чухал асуудал тулгараад байна. Ерөнхий сайд Ж.Эрдэнэбат өнгөрсөн АСЕМ-ын үеэр хэд хэдэн томоохон өрийг тэглэсэн ч дэндүү алдагдалтай төсөв одоог болтол дорвитой нөхөн сэргэлт авахгүй байсаар байгаа. Эдийн засагчдын үзэж буйгаар энэхүү хямрал ойрын нэг хоёр жилдээ үргэлжлэх бөгөөд төсвийн зөв бодлого барихгүй бол тун удахгүй Грекийн араас ороход Монгол Улс бэлэн байна.

Төсвийн хүндрэлээс гарахын тулд томоохон төсөл хөтөлбөрүүдээ хөдөлгөх эсвэл татвар нэмж, халамжийн үйлчилгээгээ танана гэх зэрэг аргууд байгаа ч эдийн засгийн хүндрэлтэй энэ цаг үед иргэдийнхээ нуруунд ийнхүү ачаа үүрүүлж болохгүй юм. Тийм ч учраас саяхан батлагдсан төсвийн тодотголд дээрх асуудлыг багтаагаагүй билээ.

Тиймээс төсвийг эхнээсээ зөв, сахилга баттай, элдэв хэрэггүй зардлыг нь танаж хасаад зөв гольдролоор нь батлахгүй бол мөнгө хөрөнгө юу ч үгүй байж баахан хэрэггүй зүйлс, хийж чадахгүй ажлуудыг хийнэ гэж баталчихаад үүнээс нь болоод төсвийн алдагдал хүлээх нь буруу юм. Дараа нь үүнийгээ засах гэж байна хэмээн тодотгол оруулж ирэхдээ цалин тэтгэвэр хасна, татвар нэмнэ гэж муйхарлаж суудаг гажиг байдлыг одооноос л засах хэрэгтэй. Өнгөрсөн дөрвөн жилд иймэрхүү байдлаар л төсөв батлагдаж, тасалдаж ирлээ.

Одоо өөрчлөх цаг болсон. Засгийн газар тэртээ тэргүй ирэх жил татвар нэмэхгүй гэх бодлого барьж байгаагаа олон нийтэд зарласан. Тиймээс 2017 оны төсөвт маш няхуур хандаж олон талаас нь бодож үзэж байгаад батлах зөв юм. Эдийн засгийн хүндрэлийг даван туулахад хамгийн тус нэмэр болох зүйл бол “Эрүүл” төсөв батлах асуудал билээ. Тиймээс Ж.Эрдэнэбат Ерөнхий сайдаар тэргүүлүүлсэн Засгийн газар энэ өдрүүдэд хамгийн чухал ажлаа хийж байна. Намрын чуулганаар монголчуудын ирээдүй шийдэгдэх чухал асуудлыг хэлэлцэнэ батална.

Ч.Ган