Монголын тэргүүн баячууд зуслангийн сууцаа хотын зах дагуу эгнүүлэн босгосоор хэдэн жилийн нүүр үзлээ. Манай сонин улс төрийн томчуудын харшийг гэрэл зургийн дуранд буулгаж, хэдэн төгрөгийн өртгөөр боссон хаусд тухалдаг талаар цуврал нийтлэл хүргэж буй. Энэ удаад буланд Намбарын Энхбаяр “уригдлаа”. Түүний амьдардаг хаус Нүхтийн аманд байрладаг. МАН-ын хуучин нэртэй МАХНамыг өөрийн биеэр тэргүүлэх болсон түүний амьдардаг хаус хоёр давхар, тоосгон байшин. Мансардан тавцан, чулуун гантиг тагт гаднах үзэмжийг нь сайтар чимжээ. Намбарын хүүгийн байшинг зах зээлийн өртөгт тооцоолбол, багаар бодоход 700 сая төгрөг хол давах аж. Нүхтийн газрын эрхийг хэрхэн олж авснаас эхлээд энэ байшин суурь, тойруулсан хашаанаас нь бодоод үзэхэд ариун хөдөлмөрөөр боссон гэхэд “но”-той. Гудамжны улстөрчөөрөө дуудуулж яваа хоёр дахь Ерөнхийлөгч асны байшинг хамгаалалтын албаны залуус булан, тохойгүй манах аж. Өвч тойруулсан төмөр хашааг дотроос нь хаалт босгож, завсраар нь харагдах боломжгүй болгожээ. Дээврийн хучлага, ус зайлуулах хоолой, гантиган хаяавч нь гэхэд л 100 сая хол давна гэж барилгын мэргэжилтнүүд дүгнэжээ. Түүнчлэн вакум цонх, тагт нийлээд мөн л 100 гаруй саяд хүрэхээр байна. Гаргаж буй энэ тооцоо зах зээлийн дундаж үнэ. Үүнээс гадна Нүхтийн аманд нэг га газар эдүгээ хэдэн саяар хэмжигдэж буй нь мөн л сонирхолтой. Ямартай ч Монголын улс төрд зөөлөн, хатуу ч гэлээ аль ч суудалд тухалсан л бол хотын захын хаа нэг лагерьт зуслангийн байшинг үнэ зодон барих нь энгийн мэт болж хувирсныг дээдсүүдийн амьдралыг хөндлөнгөөс харах борчууд бидэнд илхэн байна. Хэрэв зээ Н.Энхбаяр уг хаусаа өөрийн цэвэр хөдөлмөрөөр барьсан гэвэл өнгөрсөн хугацаанд хэдэн төгрөгийн цалингаар амьдарсан болж таарч байна. Ерөнхий сайдын албанд байхдаа авдаг цалин нь тийм ч их бус. УИХ-ын гишүүн ахуйдаа ч дан цалингаараа амьдардаг гишүүд хэрхэн “хүнд” амьдрал туулж явааг захын Хөрөнгө оруулгын мэдүүлгээс харж болно.

Т.ХАСАР nud.mn