УИХ дахь Ардчилсан намын бүлэг өргөтгөсөн хуралдаан хийж, бүлгийнхээ дэргэд Зөвлөхүүдийн зөвлөл байгуулж, тэндээ З.Энхболд, Н.Алтанхуяг, Р.Амаржаргал нарын нөхдүүдээ дуудаж авчрахаар болсон гэх мэдээлэл гарсан. Цаашлаад сүүдрийн засгийн газар байгуулах асуудлыг хөндөнө гэх мэдээлэл бас бий. Тэгвэл нэгэн цагт АН-ыг удирдаж, гүйцэтгэх засаглалын тэргүүнээр ажиллаж явсан Н.Алтанхуяг уг асуудлаар байр сууриа илэрхийлжээ. Тэр хэлэхдээ “Одоо өнгөрсөн хойно нь юугаа зөвлөх юм бэ. Бүлгийн гишүүний хувьд санал бодлоо зөндөө хэлсэн. Зөвлөх үед нь зөндөө зөвлөсөн.Үг авдаггүй шүү дээ. Уйгагүй хэлж байсан. Та бүхэн санаж байгаа. Эрх мэдлийн тэнцвэрийг хуучин гольдролд нь оруулъя  гэж хууль санаачилсан. Энхболд шүүгээндээ цоожлоод таг. Сонгуулийн хуулийг өөрчилж болохгүй гэж хэлсэн. Бас жижиг 76 тойрогболгож бүүр болохгүй гэж хоолойгоо сөөтөл хашгирсан. Сонгуулийн өмнө бүртгэлийн байгууллагаараа оролдож болохгүй, эмзэг шүү гэж хэлж зөвлөсөн маань цөөдөөгүй.” гэж хэлжээ.

Тэгэхээр Н.Алтанхуягийн тухайд лав энэ дөрвөн жилд АН-даа зөвлөөд нэг их сүйд болохгүй янзтай байна. Түүнчлэн тэрбээр “Нам бодлоготой байж, бодлогынхоо төлөө ажиллах ёстой. Харин намыг бодлого, чиглэлгүй болгосон хүмүүс огцорсон ч багадана.” гэж хэлж байна.

Эх сурвалж: Шуурхай.мн