Эрх барих эрхийг илт давуу хувиар гартаа атгасан МАН-ынхан арай л дэндүү мэдэн будилаад байх шиг.  Уг нь өнгөрсөн дөрвөн жилд тэд АН-тай засгийн эрх мэдлийг хуваалцаж байсан удаа бий, сөрөг хүчний хувиар парламентад сууж ирсэн хуучраад гавиагүй өдрүүд ч бий. Гэтэл МАН жинхэнэ утгаараа эрх мэдлийг гартаа оруулснаасаа хойш л яг л дөнгөж сая сэрж, улс орноо нэг харж байгаа аятай байцгаах болж. Ам нээвэл л хүнд болчихсон байна, хэцүүдчихсэн байна, ёстой хэлэх үг алга байна гэцгээх тэд өнгөрсөн жилүүдэд хэлгүй, дүлий, сохор байсан мэт байх нь утгагүй л юм. Эдийн засаг хүнд байгаа талаар хамгийн их хэлж ярьж байгаа Ерөнхий сайд Ж.Эрдэнэбат өмнөх засгийн үед Сангийн сайдын суудалд сууж, улс орны эдийн засагтай холбоотой бүх л статистикийг мэдэж ирсэн хүн байх ёстой. Гэтэл үгүй бололтой юм.

За тэгээд МАН-ынхан эдийн засаг ийм байна, тийм байна гэдгээр далимдуулж амласан амлалтуудаа ч хойш тавих нь эхнээсээ ойлгогдож эхэллээ. Ямартаа л УИХ-ын гишүүн Ж.Энхбаяр хэвлэлд ярихдаа “Эхлээд эдийн засгийн уналтыг зогсоох бодлого явуулах ёстой. Тэгэхгүй бол гадаад худалдаа, тэнцэл, валютын ханш гээд хямралт нөхцөл байдал гүнзгийрэх төлөвтэй боллоо. Хямралыг зогсоосны дараа мөрийн хөтөлбөрт тусгасан амлалтуудаа хэрэгжүүлэх, эдийн засгийг тэлэх үе шаттай бодлого явуулах хэрэгтэй гэж би үзэж байна. Өмнө нь баталсан улсын төсөв эдийн засгийн нөхцөл байдлаас улбаалж хэрэгжих боломжгүй болсон. Тодотгол ороод ирэхээр бүх тоо баримт олон нийтэд ил болно. Бид Хөгжлийн банк, Монголбанк болон Засгийн газраас зарцуулсан төсөвтэй холбоотой шалгах ажлын хэсэг байгуулаад ажиллаж байгаа. Олон зүйл ил тод болно. Төсвийн сахилга батаа сайжруулж аваад УИХ-ын намрын чуулганаар 2017 онд Монгол Улсыг хөгжүүлэх нийгэм эдийн засгийн үндэслэл, мөнгөний бодлого, төсвөө батлаад явах ёстой.” хэмээн ярьжээ.Уул нь энэ хүн ч өмнөх дөрвөн жилд гишүүн байсан. Улс орны нөхцөл байдлыг мэдэх л ёстой хүмүүсийн нэг. Гэтэл одоо ингээд олон зүйл ил тод болно гээд л мэдэн будилаад сууж байх.

МАН ингээд хэт мэдэн будилаад уг нь дэмий. Ард түмэн тэдний бодож буй шиг тэнэг биш л баймаар.

Эх сурвалж: Шуурхай.мн