МАХН-ын дарга Н.Энхбаярыг  АТГ-аас зургаан удаа дуудаад ирэхгүй байгаа талаар албаны нөхдүүд мэдээлж байсан. Тэгвэл энэ цаг мөчид МАХН-ын төв байранд АТГ-ын 10 гаруй албан хаагч Н.Энхбаярыг албадан саатуулахаар очоод байна. Н.Энхбаярыг албан өрөөнд нь цоожлоод байгаа бөгөөд өрөөнд нь Ц.Оюунбаатар болон өмгөөлөгч, хуульчдыг нь оруулахгүй байгаа  юм байна. АТГ-ынхан Н.Энхбаяраас байцаалт авч байна гэх  мэдээллийг өгөөд байгаа аж.

Дашрамд өгүүлэхэд, Авлигатай тэмцэх газраас Монголын Хуульчдын холбоонд хандан Н.Энхбаярт өмгөөлөгч томилж өгөхийг хүссэн албан бичгийг өнгөрсөн  сарын 26-ны өдөр хүргүүллээ гэж мэдээлсэн.  Н.Энхбаярт өмгөөллийн үйлчилгээ үзүүлэх өмгөөлөгчийн нэр одоогоор тодорхой болоогүй байгаа. АТГ-аас мэдээлснээр Н.Энхбаярыг эрүүгийн хэрэгт холбогдуулан шалгаж, удаа дараа зарлан дуудах хуудас өгсөн ч тэрээр хүрэлцэн ирэхгүй, мөрдөн байцаалтын ажиллагаанд саад учруулсаар байна. Н.Энхбаяр өөрт нь өмгөөлөгч олдохгүй байгаа гэсэн тайлбар хэлсэн тул Авлигатай тэмцэх газар Эрүүгийн байцаан шийтгэх хуулийн 40 дүгээр зүйлийн 40.1.5, 40.2-т заасан үндэслэлээр Монголын Хуульчдын холбоонд хандлаа гэж байсан юм. Өмгөөлөгчийг заавал оролцуулах зарчмын дагуу хэрэг бүртгэгч, мөрдөн байцаагч, прокурор, шүүх уг хэрэгт өмгөөлөгч оролцуулах явдлыг хангах үүрэгтэй хэмээн мэдээлэл хийж байсан.

Эх сурвалж: Шуурхай.мн