АСЕМ-ын түнш орнуудын 150 гаруй залуус чуулсан АСЕМ-ын Залуучуудын чуулган өнөөдөр Улаанбаатар хотноо  эхлэх юм. Үүнтэй холбогдуулан тус чуулганы зохион байгуулагч Гадаад хэргийн яам, Монголын Залуучуудын Холбооноос мэдээлэл хийсэн байгаа.

АСЕМ-ын дээд түвшний 11 дүгээр уулзалтын дагалдах хурлуудын нэг болох Залуучуудын Чуулган нь энэ сарын 6-10-ны өдрүүдэд үргэлжлэх бөгөөд чуулганд АСЕМ-ын гишүүн орны 100 төлөөлөгч, Монголын шилдэг 50 залуу оролцохоор бүртгүүлсэн байна. Чуулганы бэлтгэл ажил бүрэн хангагдаж байгаа талаар Монголын Залуучуудын Холбооны Удирдлага, төлөвлөлт, хамтын ажиллагааны газрын дарга Ч.Хонгорзул, Ази-Европын сангийн Боловсролын газрын  захирал Леони Нагараяан нар мэдээлсэн.

Чуулганд оролцогч гадаадын оюутан, залуучуудын дийлэнх нь Монголд анх удаа ирж байгаа бөгөөд Монгол оронтой танилцах хүсэлтэй 3900 гаруй залуучууд бүртгүүлснээс зөвхөн 100 нь шилдгээр тодорч чуулганд оролцох эрхээ олж авсан байна. Эдгээр төлөөлөгчид өчигдрөөс  эхлэн Монголд ирсэн.

4 өдөр үргэлжлэх энэхүү чуулганаар АСЕМ-ын гурван тулгуур болох улс төр, эдийн засаг, нийгэм-соёлын асуудлыг хэлэлцэх бөгөөд чуулганаас гарсан дүгнэлтийг АСЕМ-ын Дээд түвшний уулзалтад хүргүүлэх аж. Түүнчлэн зохион байгуулагчдын зүгээс 51 орны төлөөлөгч залуучуудад зориулж өөрийн орны соёл, зан заншил, Монгол залуусын орчин үеийн амьдралын хэв маягтай танилцах боломжийг бүрдүүлсэн сонирхолтой хөтөлбөрийг бэлдсэн байна. Тухайлбал, Цонжин болдог руу Чингис Хааны хөшөө дурсгалтай танилцах, наадмын нээлтийн параданд оролцох зэрэг хөтөлбөрүүд багтжээ.

АСЕМ-ын Залуучуудын Чуулганы нээлт 2016. 07. 07-ны 09 цагт Улаанбаатар чуулгад болох ба энэхүү түүхэн арга хэмжээнд олон залуусыг хамруулах зорилгоор чуулганы нээлтэнд оролцох залуучуудыг өнгөрөгч даваа гарагаас эхлэн нээлттэй бүртгэж байгаа юм байна.

Эх сурвалж: Шуурхай.мн