Юуны түрүүнд хэлэхэд энд хэн нэгнийг өмгөөлж, хэн нэгний эрх ашигт нийцүүлсэн юм байхгүй. Сонгууль дөхсөн энэ өдрүүдэд болж байгаа үйл явдлууд бол бидний байгаа л үнэн төрхийн илэрхийлэл. Өчигдөр дуулиан шуугиан тарьсан Л.Эрдэнэчимэгийн согтуу бичлэгийн тухайд Төрийн ордон бол түүний зугаа цэнгэлийн өргөө биш гэдгийг хэлээд байгаа. За харин бичлэгийг тараасан хүн нь Г.Уянга гишүүн гэдэг нь нэгэнтээ тодорхой боллоо. Учир нь бичлэгийг олон нийтэд хүргэсэн Х.Бат-Ялалт өөрийн фэйсбүүк хуудаснаа тэрийг илчлэн бичсэн байна. Тэр юу гэснийг хүргэхээсээ өмнө Л.Эрдэнэчимэгийн байр суурийг хүргэе. Тэр хэлэхдээ  ямар ч бичлэг, мэдэхгүй, үзээгүй хараагүй гээд байгаа. Мөн Х.Бат-Ялалт өөрөөс нь сонгуулийн ажилдаа хэрэглэх гээд мөнгө зээлье гэсэн учраас 50 сая төгрөг зээлдүүлсэн, гэтэл эргээд өөрийг нь реалити шоу шиг юманд оруулчихлаа. Нэр дэвшиж байгаа эмэгтэй гишүүдийг зориудаар ингэж байна гэж үзэж байгаагаа хэлж буй. Тэгвэл Х.Бат-Ялалт хэлэхдээ  “Гүтгэхгүй илчилж, доромжлохгүй шүүмжил. Энэ бол миний баримталдаг зарчим. Ард түмнээ хуурч ашиг хонжоо хайдаг төрийн түшээдийн үнэн нүүр царайг та бүхэнд илчилж өглөө. Хамгийн гол асуудал ердөө энэ. Архи тамхины дайсан Эрдэнэчимэг, ардын баатар Уянга нарын үнэн төрх энэ. Нэг нь бичээд нөгөөх нь чалчаад л…. Нөгөө төрийн ордны харуул хамгаалалт хаана байдаг юм бэ? Бүгдээрээ согтуу!!! Архи үнэртүүлэх нь байтугай чөлөөт хувцастай хэмээн нэвтэрч чаддаггүй төрийн ордон минь юу болж хувирсан юм бэ?

Эмэгтэйчүүдийн үйлдсэн зөрчлийг илчилж болдоггүй гэдгийг мэдсэнгүй. Миний, бид бүгдийн амь амьдрал, хувь заяаг атгаж буй эрхэм төрийн түшээдийн эрээ цээргүй үйлдлийг хараад тэвчиж сууж чадсангүй. Миний бие та бүхэнд улс төрчдийн увиагүй үйлдлийг баталгаатай баримт нотолгоотойгоор дэлгэлээ. Намайг юу гэж хэлэх, доромжлох чинь надад огт сонин биш. Өөрийн амьдралын 10 жилийг зарцуулан та бүхэнд шударга нийгмийг авч ирэх гэж хайртай бүхнээ золиослон тэмцсэн миний тэмцэл мохохгүй ээ. Өнөөдрийн болсон үйл явдлыг эрүүл ухаанаар тунгаах олон хүн байгаад талархаж байна. Та бүхэн дараах 2 зүйлд анхаарлаа хандуулах хэрэгтэй. Үүнд:1. Төрийн түшээд төрийн ордондоо ингэж л биеэ авч явж, өөрсдийнхөө баталсан хууль дүрмээ уландаа гишгэж Монгол төрийг бузарлаж суудаг юм байна.!!!!2. Өөрсдийн хар үйлээ нуун далдлахын тулд юугаа ч хайрлахгүй өгдөг юм байна.!!!! Энэ тухай бид бүхэн ярилцдаг атлаа баримт нотолгоотой нэг ч факт дэлгэж байгаагүй. Харин энэ удаа бид дэлгэлээ….. Эх орон чинь бутарч, ард түмэн чинь ядарч байхад юун жудаг. Тэр жудгаа улс төрчид, эрх баригчдаасаа асуух хэрэгтэй. Бүхнийг цаг хугацаа дүгнэдэг. Тиймээс цаг хугацаанд даатгаад дүгнэлтийг үлдээе.” хэмээсэн байна.

Г.Уянгын тухайд гар утсаа алдсан гэх тайлбарыг эхний байдлаар өгөөд байгаа.

За ямартай ч талуудын байр сууриа иймэрхүү байна. Мэдээж иргэд олон нийт өөр өөрийнхөө дүгнэлтээ хийж байгаа биз ээ?

Эх сурвалж: Б.Тамир, Шуурхай.мн