АН-ын дарга З.Энхболд оффшор данстангуудаас татгалзахыг уриалаад байгаа. Тэгвэл УИХ дахь МАН-ын бүлгийн дарга С.Бямбацогт уг асуудлаар байр сууриа илэрхийлжээ. Тэрээр  “Оффшор данстай бол хандны мангаа гэж хандаж болохгүй. Монгол Улсад 1993-2013 оны хооронд гадаадын хөрөнгө оруулалт хэлбэрээр 14 тэрбум ам.доллар орж ирсэн. Найман тэрбум ам.доллар нь оффшор бүсийн улс орнуудаас орж ирсэн байдаг. Өөрөөр хэлбэл, “Гадаадын хөрөнгө оруулалтаар манай улс хөгжиж, эдийн засаг сайжирсан. Харин гадаадын хөрөнгө оруулагчдыг үргээснээс болж өнөөдөр эдийн засаг хямарч, ард иргэдийн амьдрал муудаж байна” гэж бид ярьдаг. Тэгвэл гадаадаас орж ирж байгаа нийт хөрөнгийн дийлэнх нь оффшор бүсүүдээс орж ирдэг юм байна. Монгол Улсад хөрөнгө оруулалттай нийт аж ахуйн нэгжийн 920 нь оффшор компани юм байна. Жишээлбэл, “Оюутолгой”, “Энержи ресурс”, “Хүннү коал” зэрэг компаниуд бүгд оффшор компани юм байна. Ингээд үзэхээр оффшор компани хуулийн хүрээнд үйл ажиллагаа явуулсан уу, хууль зөрчсөн үү гэдэг асуудал. Оффшор компанийн хувьцаа эзэмшиж байгаа, данстай нөхөд хуулийн хүрээнд олсон орлогоороо оффшор компанийн данстай болсон уу, хууль бусаар олсон орлого, авлига авсан мөнгөөрөө тэр компанийн хувьцааг авсан уу гэдгээрээ ялгаатай байх ёстой. Оффшор болгоныг муухай гэж болохгүй. Хууль зөрчсөн үйлдлээрээ оффшор компанийн дансанд мөнгө байршуулсан бол яах аргагүй асуудал юм. Түүнээс бус “Оюутолгой”, “Энержи ресурс”, “Хүннү коал” зэргийг оффшор гэж цоллох юм бол Монгол Улсад оруулж ирсэн хөрөнгө оруулалт гараад явчих байх. “ хэмээн ярьж байна.

Б.Тамир

Эх сурвалж: Шуурхай.мн