Төрийн ордонд өнөөдөр Сонгуулийн Ерөнхий хорооноос өнөөдөр сонгуульд оролцох намуудад батламж гардуулна. Харин өнөөдрийн батламжаа гардаж авч буй намууд дунд ИЗНН болон ХҮН-ынхан багтаагүй гэдгийг баттай эх сурвалжууд мэдээллээ.

Өнгөрсөн амралтын өдрүүдэд ИЗНН-ынхан АН-ыг дэмжиж сонгуульд оролцохоор боллоо. Тэд ингэснээр УИХ-д таван суудал, НИТХ-д гурван суудал авах замаар АН-тай тохирсон гэж мэдээлж байв. Тэгвэл тус намын СЕХ-оос бичиг баримт дутуу гэсэн шалтгаанаар сонгуульд оролцох батламжийг олгохоос татгалзжээ. Улмаар өчигдөр дутуу бичиг баримтаа гүйцээгээд өгсөн боловч СЕХ-ноос өнөөдөр сонгуульд оролцох боломжгүй гэдгийг нь дахин албан ёсоор мэдэгдсэн аж.

Баттай эх сурвалжийн мэдээлж буйгаар тус нам сонгуульд орж чадаагүй нь дотоодын хагаралдаантай нь шууд холбоотой аж. Тодруулбал, тус намын гишүүн Улс төрийн зөвлөлийн гишүүн Ц.Энхтуяа нь намын дарга С.Оюуны өмнөөс гарын үсэг зурж явуулсан гэнэ. Учир нь Ц.Энхтуяа, Ц.Ганхуяг тэргүүтэй зарим гишүүд нь сонгуульд АН-тай нэгдэж сонгуульд орохыг дэмжихгүй байгаа аж. Харин намын удирдлагууд нь дангаараа сонгуульд оролцоод амжилт гаргаж чадахгүй тиймээс таван гишүүнээ УИХ-д оруулах аргыг сонгох нь зүйтэй гэж үзэж байгаа юм байна. Тиймээс намын даргынхаа өмнөөс ийнхүү сонгуульд оролцох хүсэлтийг явуулсан бололтой. Мөн Ц.Ганхуяг нь өнгөрсөн өдрүүдэд МАХН-тай эвсэх асуудлыг ярьж байсан ч намын удирдлагуудаасаа дэмжлэг авч чадаагүй юм.

Дашрамд сонирхуулахад Ц.Энхтуяа нь УИХ-ын гишүүн Х.Баттулгын анхны эхнэр гэгддэг юм. Тиймээс үүнийг ИЗНН-ыг АН руу “гүйлгэхгүй” байхын тулд хөндлөнгөөс зориудаар ийнхүү нөлөөлсөн байж ч болзошгүй гэж таамаглаж байгаа гэнэ. Ямартаа ч жижиг намууд ирэх сонгуульд ямар ч хамаагүй үнээр оролцож ганц ч гэсэн суудал авахаар зүтгэж байгаа нь тодорхой боллоо. Ингэхийн тулд АН тэргүүтэй улс төрийн томоохон хүчнүүдэд сайн дураар дагаар орж хүчээ өргөж эхлэв.

Харин ХҮН-ын хувьд мөн л дотоодын зөрчил тэмцэл, дотоод асуудлаасаа болж сонгуульд оролцож чадахааргүй болжээ. Тэд мөн АН-ыг дэмжиж сонгуульд оролцоно гэж мэдэгдээд байгаа.

Ч.Ган

Zaluu.com