Хоёр туулай хөөгөөд хоосон хоцордог бичигдээгүй хууль МАХН-ын дарга Н.Энхбаярт давтагдаж магадгүй болоод байна. Угшил нэгтэй МАН-тай эвсэнэ гэж ажлын хэсэг байгуулж, 10 удаа хуралдан байж тохиолцсон зургаан зүйл бүхий хэлцлийг шууд л “нулимж” орхив. Ямартай ч Н.Энхбаяр гэдэн хувь хүний хүсэл тааллаар МАН, МАХН эвсэх тухай яриа хөөрөө энэ хүртлээ өндрөө аваад ингэсхийгээд намжиж байна. Эх орончдын баярыг мөр зэрэгцэн хамтдаа тэмдэглэсэн МАН, МАХН-ыг сонгуулиар хүчээ нэгтгэж, нийтлэг эрх ашгийн төлөө хамтарна гэсэн нийгмийн хүлээлт ийнхүү Н.Энхбаяр гэдэг хүний хүссэнчлэн талаар болов. Өөрөөр хэлбэл, Н.Энхбаяр өөрт олдсон боломж буюу эхний “туулай”-гаа эргэж хургасаар нэгмөсөн тавьж явуулав.

Харин сонгууль ойртсон энэ үед эрх баригч АН-аас санаачилсан түүнийг ялгүйд тооцох тогтоол Н.Энхбаяр ихээхэн найдвар төрүүлж орхисон бололтой юм. МАН, МАХН эвсээд сонгуульд орвол дангаараа оролцох гэж байгаа АН-ынхан буланд шахагдана. Тиймээс өрсөж илүү санал тавьж, Н.Энхбаярыг чөдөрлөж авахын тулд АН-ын удирдлагуудын тархиа гашилгасны эцэст “төрүүлсэн” шийдвэр нь энэхүү тогтоол аж. Хэдий Н.Энхбаярт гэж хаяглаагүй ч энэ тогтоол МАХН-ын дарга хэмээх хувь хүний цаашдын улс төрийн замыг дардан болгох гэсэн том зорилго агуулж буй нь тодорхой. 2017 оны наймдугаар сар хүртэл ялгүйд тооцох хугацаа нь дуусахгүй буюу УИХ, Ерөнхийлөгчийн сонгуульд оролцох эрхгүй Н.Энхбаярт эрх баригч АН уг тогтоолоор бэлэг барьж “хайр зарлаад” буй нь энэ аж.

Эрх баригчдаас түүнд зэхсэн энэ бэлэг чухам ямар зам мөр дагуулах вэ. Наанаа зөвхөн түүнийг “ялтай” гэх гинжнээс салгахаар сонгуулийн өмнө түүнд боломж олгож буй мэт. Гэвч сонгууль болгоны өмнө түүгээр даажигнаж орхидог түүхийг тэр мартлаа гэж үү. 2012 оны сонгуулийн өмнө Н.Энхбаярыг оймсыг нь гозолзуулж баривчилсан удаатай. Гэтэл сонгуулийн дөрвөн жилийн тэрхүү мөчлөг дээр АН түүнд дахин нэг зүйлээр ийнхүү бэлэг барих гэж байна. Тогтоолыг олонхийн товчлуураар дэмжиж баталлаа гэхэд Ерөнхийлөгчийн хориг, Цэцийн босго гээд отож хүлээж байгаа олон зүйл бий. Улс төрд даруулсан “хар тамга”-ыг нь арилгах гэнэтийн ийм тогтоол Ерөнхийлөгч, Цэцийн хамар доогуур ногоон гэрлээр гарахгүй нь ойлгомжтой. Тэгэхээр Н.Энхбаярын хөөсөн хоёр дахь туулай ч замын дунд зам зорилго нь бүдгэрч зорьсон эзнийхээ хүслийг гүйцээж чадахгүй эцэх магадлалтай.

Нөгөө талаас Н.Энхбаяртай 10 жилийн хамтын ажиллагааны гэрээ байгууллаа гээд Н.Алтанхуягаа тал талаас нь мэрж, Ерөнхий сайдын албыг нь намынх нь даргатай хамт авчихсан ардчиллынхан МАХН-ын даргад ийм шинэ боломж олгох гэж байгаад дуугүй суух болов уу. Ардчиллын үнэ цэнийг үгүй болгох оролдлого ардчиллаар овоглосон энэ намаас удаа дараа гараад байхад тэд чимээгүй суусаар байх уу? Энэ мэтчилэн АН-ынхан гишүүд удирдлагуудаасаа ам асуугаад эхэлбэл МАХН-ын дарга Н.Энхбаярын хүсэл биелэгдэхэд хэцүүхэн дүр зураг дурайж байна. Ингэснээр тэр эвсэн нийлэх МАН ч үгүй, ялгүй болох тогтоол ч үгүй хоёр туулай хөөгөөд хоосон хоцорч ч мэдэх.

 С.Буян

Эх сурвалж: Шуурхай.мн