Манай Дашинчилэн сумын нутагт “Алтан Дорнод Монгол” гэж урт нэртэй компанийн захирал, ХҮН гэж товч нэртэй намын дарга Т.Ганболд байгалийн баялгийг хууль бусаар ашиглаж, байгаль орчинд онц их хэмжээний хохирол учруулаад байна. ХҮН-ийн дарга Т.Ганболдын энэхүү хууль зөрчсөн үйл ажиллагааг аймаг, сумын удирдлагууд, мэргэжлийн хяналтын газар таслан зогсоохгүй байгаа бөгөөд анхан болон дунд шатны цагдаа, прокурорын байгууллагын удирдлагууд хуулийн дагуу шийдвэрлэхгүй байсаар өнөөдрийг хүрлээ.

Энэхүү асуудал нь зөвхөн иргэн Д.Туяагийн асуудал биш юм. Туул голын сав газрыг даган амьдарч байгаа таван аймаг, 37 сум, нийслэлийн долоон дүүргийн нэг сая 141 мянган иргэний “Үндсэн хууль”-иар олгогдсон “Эрүүл аюулгүй орчинд амьдрах, аж төрөх эрх “зөрчигдөж байгаа ноцтой асуудал. Олон албан тушаалаар цоллуулдаг ч надтай адил иргэн Т.Ганболд нь өөрийн компанийн хууль бус үйл ажиллагааг нуун дарагдуулахын тулд нутаг усаа хамгаалж байгаа жирийн иргэнийг гүтгэх, сүрдүүлэх бусармаг ажиллагаа явуулаад зогсохгүй, хууль хяналтын байгууллагын бусармаг ажилтнуудтай хуйвалдан, зохиомлоор хэрэг тулгаж байна.

Иймд Та өөрийн эрх үүргийн хүрээнд уул уурхайн компанийн албат болоод байгаа хууль хяналтын байгууллагын удирдлагуудын үйл ажиллагаанд анхаарлаа хандуулж, эгэл жирийн иргэд биднийхээ эрхийг хамгаалж өгнө үү. Ерөнхийлөгчтэй уулзах иргэдийн нэрсийн жагсаалтанд 2015 оны хоёрдугаар сарын 10-ны өдөр нэрээ бичүүлсэн. Өнөөдрийг хүртэл хүлээсээр сууна.

Саяхан Та хариуцлагын талаар хууль санаачилсан. Хариуцлага, хяналтын талаар түмэнтэй дуугарсан. Хүссэн нийгмээ бид Таны зөв зүйтэй олон санаачлагыг дэмжиж бүтээнэ гэдэгт итгэдэг.

Таныг хүндэтгэсэн Дуламын Туяа