Хаврын чуулганы хамгийн анхны хуралдаанаар юу хэлэлцсэн тухай УИХ дахь МАН-ын бүлгийн дарга С.Бямбацогт, дэд дарга Д.Хаянхярваа, Н.Номтойбаяр нар мэдээлэл хийлээ.

Тэдний ярьснаар бүлгийн хуралдаан нь улс төр, нийгэм, эдийн засгийн өнөөгийн байдал, орон нутаг, нийслэлийн дүүргүүдэд гишүүд хэрхэн ажилласан тухай мэдээлэл солилцсон байна. Мөн цаашид авах арга хэмжээ, гарцын талаар хэлэлцжээ. Харин энэ долоо хоногт УИХ-аар хэлэлцэх хуулийн төслүүдийн талаар байр сууриа нэгтгэсэн байна.

           МАН-ын бүлгийн онцолж байгаа асуудал бол УИХ-ын дарга З.Энхболдыг огцруулахаар шийдлээ. МАН-ын бүлэг З.Энхболд нь цөмийн хог хаягдлыг үүссэн улс оронд нь булшлах конвенцид нэгдэн орох асуудлыг ээлжит бус чуулганаар хэлэлцэх гэж оролдсон гэж үзжээ.

Бүлгийн дарга С.Бямбацогт хэлэхдээ “УИХ-ын дарга З.Энхболд энэ албан тушаалд хууль зөрчиж томилогдсон. Томилогдсоны дараа МАН-ыг бүлэггүй байлгах, гишүүдийн байнгын хороонд харьяалагдах эрхийг хязгаарласан. УИХ-ын гишүүдийн хэлсэн үгэнд тайлбар хийж, доромжлох хандалга газар авсан. Зайлшгүй шаардлагатай бус асуудлуудыг хэлэлцэх гэж ээлжит бус чуулганыг удаа дараа зарлаж байна. Ээлжит бус чуулганаар авлигачдыг өршөөх, сайд нарыг огцруулах асуудлыг хэлэлцсэн юм. Хамгийн сүүлийн хэлэлцүүлэгт УИХ-ын дарга улс оронд цөмийн хог хаягдлыг булшлах конвенцид нэгдэн орох асуудлыг хэлэлцэх гэж оролдлоо. Иймээс УИХ-ын даргын албан тушаалыг хаших ёс зүйн эрхгүй гэж үзэж огцруулах саналаа тавихаар болсон” гэв.

Б.УЧИРМАА

Эх сурвалж: Шуурхай.мн