Зам тээврийн яаманд үндсэн чиг үүргийн дагуу асар их мөнгө эргэлддэг газар тул тендерийн маргаан, агаарийн тээвэр, замын барилгын асуудлууд ямагт олны анхаарлыг татсаар ирсэн. Хамгийн сүүлчийн мэдээлллээр л гэхэд Зам тээврийн яамны авто замын тээврийн бодлогын зохицуулах газрын дарга Д.Доржханд өөрийн “Хятад” хүргэнээ замын тендерт ялуулахаар илтэд зүтгэж байгаа хэрэг маргаан дагуулж байна.

Асуудлыг тодруулбал, Зам тээврийн яамнаас өнгөрсөн оны наймдугаар сард урд хөршийн хөнгөлөлттэй зээлээр санхүүжих Тосонцэнгэл-Улиастай чиглэлийн 114 км автозамын барилгын ажлын тендерийг зарласан байдаг. Хөнгөлөлттэй зээлийг урд хөршийн Exim банкаар дамжуулан санхүүжүүлэх тул банкны дүрмийн дагуу манай улсад нэр бүхий гурван компаниас аль нэгийг нь шалгаруулахыг санал болгосон аж.

Харин уг тендерийг зарлахдаа Зам тээврийн яамны авто замын тээврийн бодлогын зохицуулах газрын дарга Д.Доржханд зориудаар цаг хожиж, нэр бүхий гурван компанийн хоёртой нь үнэ буулгах хэлэлцээр хийх, үнийн саналыг хууль зөрчих замаар дахин авах зэргээр тендерийн ажлыг уясан байж болзошгүй байна.

Д.Доржханд хоёр дахь удаагаа үнэ авахдаа урд хөршийн Exim банкнаас нэрийг нь өгсөн гурван компанийн нэгээс нь үнийн санал авахаас татгалзах зэргээр хугацаа хожсон байна. Ингэж үнэ буулгах асуудлаар тендерийн ажлыг саатуулж байж, 42 сая ам.долларын өртөгөөр Тосонцэнгэл-Улиастай чиглэлийн 114 км замыг өөрийн хүргэний гэгдэх “Hinjiang Beixiin Road and bridge group” –д өгөхөөр холбогдох албаныхантай тохиролцсон гэдгийг учир мэдэх хүмүүс нь ярьдаг.

Тендерт оролцож буй нөгөө хоёр компани нь Тосонцэнгэл-Улиастай чиглэлийн 114 км замыг 41 сая ам.доллараар барих боломжтой гэж үзсэн байна. Түүгээр ч зогсохгүй замын ажлын 30 хувьд туслан гүйцэтгэгчээр Монгол компани ажиллуулах саналаа урд хөршийн компанийн зүгээс хүргүүлсээр байхад ч үл тоосон гэх.

Нэгэнт хөнгөлөлттэй зээлээр баригдах замын ажлыг Монгол компани бие даан хийх гэрээний эрхгүй. Үүнийг овжингоор ашиглаж, зам тээврийн яамны өндөр албан тушаалтнууд урд хөршийн компаниудыг хооронд нь муудалцуулан байж, нэгнийхээ хүргэнд тендер өгөх лоббиг шамдан хийцгээж байгаа бололтой. Уг нь эдийн засаг хямралтай энэ үед 41 сая ам.доллароор баригдах үнийн саналаа чухалчилмаар. Гэтэл нэг сая ам.доллараар илүү үнэ хэлсэн компаниад өгөхөөр улайрч буй нь ашиг сонирхолын зөрчилтэй хүн юм биш үү гэсэн хардлагыг эрхгүй төрүүлж байна.

А.Баярмаа

Эх сурвалж: Dorgio.mn