“Нийтийн эрхийг хамгаалах холбоо”-ны хуульчдын баг өнгөрсөн амралтын өдрүүдэд Чингэлтэй дүүргийн гэр хорооллын дахин төлөвлөлтөнд хамрагдсан 7, 9,10,11,15-р хороодын иргэдтэй уулзаж, үүсээд байгаа нөхцөл байдалтай танилцжээ.  Тус хороодод дахин төлөвлөлтийн ажил харилцан адилгүй байгаа ч гэрээнд заасан хугацаанд нэг ч айл орон сууцандаа орохгүй нь тодорхой байгаа юм. Тухайлбал ЧД-ийн 7-р хороонд сонгогдсон “Б..” констракшн 2016 онд орон сууцаа ашиглалтанд оруулахаар айлуудтай гэрээгээ хийгээд хийгээд 2-3 жилийн нүүр үзэж байгаа ч өнөөг хэр нь ажлаа эхлэх нь бүүхэл дэд бүтцийн асуудлаа шийдээгүй, техник эдийн засгийн үндэслэл нь тодорхойгүй, мөнгөгүй гэдэг шалтгаан тоочсоор өнөөг хүрчээ.

Мөн тус дүүргийн 11-р хороонд сонгогдсон “М” компани 380 гаруй айлуудтай гурвалсан гэрээгээ байгуулсан ч мөн л ажлаа эхлээгүй, хэзээ эхлэх нь тодорхойгүй байдалтай байгаа юм. Түүнчлэн 10-р хороонд ч яг ижил дүр зурагтай, Б компанийн ажил зогсонги байдалтай байлаа.

Ийнхүү Чингэлтэй дүүргийн дахин төлөвлөлтөд хамрагдсан аль ч хорооны иргэд 2016 онд орон сууцанд орох нь тодорхойгүй хугацаагаар хойшилж, тэдний мөрөөдөл салхинд хийслээ. Гэтэл айлууд нийслэлийн удирдлагууд болон барилгын компаниудын худал амлалтаас болж гэрээ хийсэн айлууд хашаа хороогоо засч сэлбэж чадахгүй, байшин, үл хөдлөх хөрөнгөө барьж тохижуулж чадахгүй хүндхэн байдалд ороод байна. Тиймээс иргэдийн дийлэнх нь компаниудтай хийсэн гэрээгээ шинэчлэх, өөрсдийн эрх ашгийг тусгах, барилга барих эсэх, хэзээ ашиглалтанд орохыг тодорхой болгох, хэрэв ойлголцолд хүрэхгүй бол гэрээгээ цуцлах хүртэл арга хэмжээ авах хүсэлтэй байгаагаа хэлж байлаа.

Чингэлтэй дүүргийн 11-р хорооны иргэн “Б” хэлэхдээ: -“Манай хороонд дахин төлөвлөлт хийхээр 4 компани ирсэн. Бид өмнө нь үйл ажиллагаа явуулж байсан туршлагатайг нь бодож “М” гэх компанийг сонгосон. Бидэнтэй анх гэрээ хийхдээ орон гэрээр ч ороогүй, хорооны иргэний танхимд дудудан танайхаас бусад айлууд бүгд хийсэн, одоо танайх л үлдлээ. Танд тавьж байгаа санал бол хамгийн боломжит нөхцөл… гэх зэргээр нэг ёсондоо тулган шаардах маягаар гэрээ хийсэн. Бид ч амьдарч байгаа орчин нөхцлөө сайжруулъя, байранд оръё гэсэн бодолтой байсан болохоор итгээд гэрээг нь хийж, газраа өгөх нь өгөөд, нүүх нь нүүгээд явсан. Гэтэл одоо хүртэл байрандаа ч орсон зүлйгүй, дээрээс нь түрээсийн байрны мөнгөө олох гэж сар бүр үйлээ үзэж байна. Хэрэв төр иргэддээ гавъяа болохгүй юм бол ядаж гай болохгүй баймаар байна. Дахин төлөвлөлт гэж иргэдийг үймүүлээгүй бол бид одоо хашаа байшингаа тохижуулаад сайхан амьдарч байх байлаа.” гэсэн юм.

Барилгын компаниудын иргэдтэй хийсэн гэрээ нь хэт нэг талын давуу байдлыг тусгасан, иргэдийн хууль эрхзүйн мэдлэггүй байдлыг далимдуулан хууран мэхлэх замаар хийсэн гэрээ байж болох талтайг ч хуульчид хэлсэн. Тиймээс иргэд хотын удирдлагууд, барилгын компаниуд, туршлагатай хуульчид, гэрээ хийсэн айлууд гээд бүх талуудыг байлцуулан нэгдсэн нэг шйидэлд хүрэх хүсэлтэй байгаа юм.  “Гэр хороолол дахин төлөвлөлтийн үйл ажиллагааны журмын

4.10. / “Оршин суугчдын түр зөвлөл нь төсөл хэрэгжүүлэгчид дэмжлэг үзүүлэх, газар, үл хөдлөх эд хөрөнгө өмчлөгч, эзэмшигчийн эрх, ашиг сонирхлыг хамгаалах чиг үүргийг хэрэгжүүлнэ.”/ мөн журмын  4.25-д “Төсөл хэрэгжүүлэгч нь төслийн барилгажилтын ажлыг 6 сар хүртэлх хугацаанд эхлүүлээгүй, төслийг хэрэгжүүлэх явцдаа үйл ажиллагааны болон техникийн ноцтой зөрчил удаа дараа гаргасан нь нотлогдсон, Гурван талт гэрээгээр хүлээсэн үүргээ биелүүлээгүй тохиолдолд гэр хорооллын дахин төлөвлөлтийн Төслийн удирдах хорооны ажлын албаны саналыг үндэслэн төсөл хэрэгжүүлэгчээр батламжилсан захирамжийг хүчингүй болгоно.” гэж заасны дагуу дахин төлөвлөлтөнд хамрагдсан иргэд дахин төлөвлөлтийн компаниудаас гэрээний биелэлтийг шаардах, гэрээг цуцлах эрх нь нээгдэж байгаа юм .

Эх сурвалж: Шуурхай.мн