Өмнөд Суданы армиудын генералууд “НҮБ-ын энхийг сахиулагчдаас Монголын зэвсэгт хүчин л зөвхөн бидэнтэй тэмцэх чадвартай” гэж хэлжээ. Олон овог, аймгаас бүрддэг Африкийн Судан Улсын өмнөд хэсэгт 1950-иад оны үед Засгийн газрынхаа шийдвэрийг эсэргүүцэгч салан тусгаарлагчид бий болж 2005 оныг хүртэл Засгийн газартайгаа дайтаж, энэхүү дайнд 1.5 сая хүн амь үрэгдсэний эцэст НҮБ оролцож хоёр талыг гал зогсоолгосон. Олон жилийн цус асгаруулсан энэхүү иргэний дайны гол үндэс нь Суданы өмнө хэсгийн газрын тос ихтэй газар нутаг юм.

Нэг талаас газрын тосны нөөц ихтэй өмнөд нутгийг авч бие даасан улс байгуулах, нөгөө талаас алслагдмал ч гэлээ ашигтай газраа алдахгүй гэсэн хүсэл эрмэлзэл ийнхүү 1.5 сая хүний аминд хүрч, 2.4 сая хүнийг шилжилт хөдөлгөөн хийхэд хүргэж, 650 мянган хүн хөрш орнууд уруу дүрвэж, 4.6 сая хүн хүнсний хомсдолд ороход нөлөөлжээ.

Юутай ч, 2011 онд Суданаас салан тусгаарласан Өмнөд Судан хэмээх дэлхийн хамгийн отгон улс тусгаар тогтнолоо зарлаж, НҮБ-ын 193 дахь гишүүн орон болсон. Гэсэн ч Өмнөд Суданд одоог хүртэл эмх замбараагүй байдал, хүчирхийлэл үргэлжилсээр байгаа юм. Хэдийгээр Өмнөд Суданд Суданы зүгээс ирэх аюул байхгүй болсон ч дотоодын олон омгуудын тэмцлээс үүдэлтэй хүчирхийлэл оршсоор байгаа аж. Ямартай ч, НҮБ олон улсын энхийг сахиулагчдаа Өмнөд Судан Улс уруу илгээж, тус улсын Засгийн газрын цэргүүдтэй хамтран бүс нутгуудыг энх тайвныг тогтоож байгаа.

Гэсэн ч Өмнөд Суданд буй олон армийн генерал, омгийн толгойлогч, босогчдын удирдагч нар Засгийн газрынхаа эсрэг тэмцэл өрнүүлж байгаа аж. Тухайлбал, Шиллук омгийн толгойлогч, генерал Жонсон Олона “Засгийн газрын эсрэг тэмцэлд НҮБ-ын энхийг сахиулагчдаас зөвхөн Монголын арми л бидэнтэй тэмцэх чадвартай” гэж хэлжээ.

Мөн Өмнөд Суданы Ардын чөлөөлөх армийн генерал Пол Малон Аван Өмнөд Судан дахь НҮБ-ын энхийг сахиулах даалгаварын командлагч болон Засгийн газрын армийн командлагч нартай уулзах үеэрээ “Энд буй 10 гаруй орнуудын цэргүүдээс Монголын арми л зөвхөн бидэнтэй тэмцэх чадалтай” хэмээгээд “Бусад нь үнэмшил төрүүлэхгүй” байгаа тухай ярьжээ. Ямартай ч, Өмнөд Суданд Монголын 850 хүний бүрэлдэхүүнтэй арми байрлан ажиллаж байгаа бөгөөд Өмнөд Суданчуудаас хүүхдүүдийнх нь аюулгүй байдлыг сайн хангаж байгаа хэмээн ихээхэн хүндлэл хүлээж байгаа аж. Түүнчлэн тэнд Монголын зэвсэгт хүчнийг “МОНГБАТТ” /Монголиан Батальоны товчлол/ хэмээн нэрлэдэг гэнэ.

Төгс